Сұранысы жоғары бұл өнім нарықтағы бағадан арзан әрі сапасы жағынан тиімді болып отыр, – деп хабарлайды Polisia.kz. Қазіргі таңда құрылыс саласы қарқынды дамып, сапалы әрі тиімді материалдарға сұраныс артып келеді. Солардың бірі – экономикалық жағынан тиімді, жылу сақтағыш, экологиялық таза және өртке төзімді полистиролблок.
Бұл өнім Қызылорда облысы бойынша қылмыстық-атқару жүйесі департаментінің №60 мекемесінде өндіріле бастады. Өндіріс аумағында жұмыс істейтін «Ален» жеке кәсіпкерлігі бұған дейін газоблок, құмблок, брусчатка және теплофасад шығарып келген. Енді кәсіпорын полистиролблок өндірісін де іске қосты. Кәсіпкер Ален Әлібековтың айтуынша, сотталғандар шығаратын өнімге сұраныс жоғары. Бағасының нарықтағыдан төмен болуы тапсырыстардың артуына әсер етіп отыр.
– Қажетті шикізат жеткізіліп, дайын өнімді сотталғандардың өздері әзірлейді. Қазіргі таңда ірі құрылыс нысандарына, соның ішінде мейрамхана құрылысына тапсырыстар қабылдадық. Бұл материалдармен ғимараттарды тез тұрғызуға болады. Өнім сапасына ерекше мән береміз, – дейді кәсіпкер.
Өндірісте еңбек етіп жүрген сотталғандардың бірі Марат полистиролблок дайындау аса күрделі емес екенін, бірақ ұқыптылық пен жауапкершілікті талап ететінін айтады.
– Бұл материал цемент, құм, желім, пенопласт үгінділері және арнайы қоспалардан жасалады. Қазір ірі көлемдегі өнімдер дайындап жатырмыз. Күніне 30-дан астам блок шығарамыз. Бұған дейін газоблок пен брусчатка да жасадық. Жұмыс барысында көп нәрсені үйрендік. Еңбегіміз үшін ай сайын жалақы аламыз. Бостандыққа шыққан соң осы бағытта кәсіп ашқым келеді, – дейді ол.
Мамандардың айтуынша, мұндай өндіріс сотталғандарды еңбекке баулып қана қоймай, олардың қоғамға қайта бейімделуіне мүмкіндік береді.
