Қайғылы оқиға 12 сәуірге қараған түні елордалық «Көркем-3» тұрғын үй кешенінде (Түркістан көшесі, 14А) 21 қабатты үйдің 15-қабатындағы пәтерде болған. Өрт толығымен сөндірілгеннен кейін пәтер ішінен кәмелетке толмаған балалардың мәйіті табылған. Олар 13 және 5 жастағы қыздар, сондай-ақ екі жастағы ұл бала.
Полицияның хабарлауынша, аталған дерек бойынша сотқа дейінгі тергеу басталып, барлық мән-жай жан-жақты тексеріліп жатыр.
Тергеу нәтижесінде оқиғаға құқықтық баға берілмек. Өрт кезінде пәтерде болған әйел адам тірі қалған. Ол күйік жарақатымен ауруханаға жеткізілді.
Құтқарушылар жоғары қабаттардан 20 адамды эвакуациялаған, тағы 40-қа жуық тұрғын өз бетімен сыртқа шыққан.
Қазіргі уақытта өрттің шығу себептері анықталып жатыр.
