Жұмыс барысында топ мүшелері Бақтыбай батыр көшесінің бойындағы кәсіпкерлік объектілерді және базар аумағындағы сауда қатарларын аралап, олардың санитарлық ахуалы мен сыртқы көрінісіне назар аударды. Нысандардың қасбеттерін қалыпқа келтіру, бояу, сырлау, айналаны тазалау, жарнамалық маңдайшаларды жаңарту, дүкен әйнектерін ретке келтіру мәселелері қозғалды.
Сала жетекшілері базар әкімшіліктеріне сауда орындарында тазалық талаптарын сақтау, ішкі және сыртқы күтімді тұрақты түрде жүргізу қажеттігін жеткізді. Сонымен қатар, сатушылар мен келушілер үшін жайлы әрі қауіпсіз орта қалыптастырудың маңыздылығы атап өтілді.
Аудандық полиция бөліміне базар маңындағы негізгі көшелерде көлік қозғалысын жүйелеу тапсырылды. Ал кәсіпкерлік бөліміне кәсіп иелерімен бірлесе отырып, нысандардың келбетін жаңғырту, ескірген жарнамаларды ауыстыру, сауда орындарының сыртқы бейнесін ретке келтіру міндеті жүктелді.
Мобильдік топ өкілдері кәсіпкерлермен жүздесіп, ағымдағы жылдың наурыз айынан бастап қолданысқа енгізілген талаптарға сәйкес нысандардың сыртқы жағдайын тиісті деңгейде ұстау керектігін түсіндірді.
Аталған мобильдік топ құрамында кәсіпкерлік, кірістер, құрылыс және тұрғын үй-коммуналдық шаруашылық салаларының мамандары, аудандық полиция бөлімі, сондай-ақ қала әкімі аппаратының қызметкерлері болды.
Аудан тұрғындары мен кәсіпкерлерін қоршаған ортаның тазалығына немқұрайлы қарамай, өздеріне тиесілі нысандардың сыртқы келбетін талапқа сай күтіп ұстауға шақырамыз.
