Мәжіліске аудандық мәслихат төрағасы, аудан әкімінің орынбасарлары, «Amanat» партиясы аудандық филиалының атқарушы хатшысы, дербес бөлім басшылары, сондай-ақ кент және ауылдық округ әкімдері қатысты.
Мәжіліс барысында ауданның «Инклюзивті саясатты іске асыру шаралары туралы» мәселесі жан-жақты талқыланды.
Мемлекет басшысы өз жолдауларында азаматтардың әл-ауқатын арттырумен қатар, қоғамның барлық мүшесіне тең мүмкіндік берудің маңыздылығын үнемі атап өтеді. Осыған байланысты, аудан деңгейінде де біз бұл бағыттағы жұмысты жүйелі түрде жүргізуіміз қажет. Инклюзивті саясат — қоғамдағы әрбір азаматтың, оның ішінде мүмкіндігі шектеулі жандардың, көпбалалы отбасылардың, қарттардың және басқа да әлеуметтік топтардың қоғам өміріне толыққанды қатысуына жағдай жасау.
Қарапайым тілмен айтқанда, бұл саясат ешкімді бөліп жармай, барлығына тең мүмкіндік беруді көздейді.
Инклюзивті саясатты іске асыру — барлық мемлекеттік органдардың ортақ міндеті. Әрбір сала өз бағыты бойынша нақты нәтиже көрсетуі тиіс. Бұл жерде формалды тәсілге жол берілмеуі керек!
Біздің басты мақсатымыз — ауданымызда әрбір азамат өзін қоғамның толыққанды мүшесі ретінде сезінетін жағдай қалыптастыру.
Осы бағыттағы жұмыстарды жүргізу мақсатында нақты шаралар қабылдау керек» – деді аудан әкімі Айтбай Жандарбеков.
Мәжілісте Облыстық білім басқармасының Шиелі ауданы бойынша білім бөлімінің басшысы Дәуренбек Насибеков күн тәртібіндегі мәселе бойынша баяндама жасады.
Мәжіліс қорытындысында аудан әкімі Айтбай Жандарбеков жауапты сала басшыларына нақты тапсырмалар жүктеп, белгіленген міндеттердің сапалы әрі уақытылы орындалуын қатаң бақылауда ұстауды тапсырды.
@Шиелі ауданы әкімінің баспасөз қызметі
