Ертесімен аудан орталығындағы «Тағзым» алаңына жиналған қауым тар заманда тобықтан қан кешіп, оқ пен оттың ортасында Отан үшін жанын қиған боздақтарды бір минут үнсіздікпен еске алып, рухына арнап Құран бағыштады.
Салтанатты шарада аудан әкімінің орынбасары Нұрмұхамед Бохаев сөз алып, аудан тұрғындарын мерекемен құттықтады.
«Қадірлі жерлестер, 9 мамыр – адамзат тарихындағы ең қасіретті кезеңдердің бірі болған Ұлы Отан соғысындағы Жеңістің 81 жылдығы. Бұл тек күнтізбедегі дата ғана емес, жүректерге жазылған тағзым, ұрпақтан-ұрпаққа жалғасқан аманат, бейбіт өмірдің бағасын ұғындыратын қасиетті мереке.
Иә, тарихта мәңгі өшпейтін күндер болады. Ол күндер – халық жадында жатталып, ұрпақ санасына сіңіп, елдің аңызына айналады. Солардың ең қасіреттісі де қасиеттісі һәм қастерлісі – Ұлы Отан соғысының отты жылдары. Бұл күн еске алу ғана емес, сабақ алу күні. Біз өткеннен тағылым алып, болашаққа сеніммен қарауымыз керек. Жеңіс күні – әрбіріміздің жүрегімізге жақын, қасиетті мереке. Ол бізге бейбіт өмірдің қаншалықты қымбат екенін еске салады. Ендеше, осы тыныштықты сақтап, елдің амандығы үшін еңбек ету баршамызға ортақ міндет. Еліміз аман, жұртымыз тыныш, аспанымыз ашық болсын! Бірлігіміз бекем, тәуелсіздігіміз тұғырлы болсын!», — деп ізгі лебізін білдірді.
Шара соңында қан майданда Отан үшін от кешіп, майдан даласында ерлікпен қаза тапқан жауынгерлерге арналған ескерткіш тақта мен Мәңгілік алауға гүл шоқтары қойылды.
