Осы мақсатта бүгін Үкімет отырысынан кейін облыс әкімінің төрағалығымен өткен мәжілісте «Жол қозғалысы мен жаяу жүргіншілердің қауіпсіздігін қамтамасыз ету туралы» мәселе жан-жақты талқыланды. Мәжілісте берілген тапсырмалар негізінде қала әкімдігінде арнайы жиын өткізіліп, шаһар басшысы Нұржан Ахатов жауапты сала басшыларына нақты міндеттер жүктеді.
Кеңесте жол инфрақұрылымын жаңғырту, тұрғындардың қауіпсіздігін қамтамасыз ету, жол қозғалысын тиімді ұйымдастыру және цифрлық бақылау жүйелерін дамыту мәселелері кеңінен сөз болды. Қала әкімі қауіпсіз жол ортасын қалыптастыру тек инженерлік жұмыстармен ғана шектелмей, цифрлық технологияларды тиімді пайдаланумен қатар жүруі тиіс екенін атап өтті.
Биыл Қызылорда қаласының жол-көлік инфрақұрылымын дамытуға жалпы көлемі 38 миллиард теңгені құрайтын ауқымды жобалар жүзеге асырылуда. Бұл қаражат жаңа жолдар салуға, көшелерді қайта жаңғыртуға, жолдардың сапасын арттыруға және көлік қозғалысын қауіпсіз ұйымдастыруға бағытталған. Сонымен қатар тұрғындардың кешкі және түнгі уақыттағы қауіпсіздігін қамтамасыз ету мақсатында 42 көшені жарықтандыруға арналған жобалар әзірленіп, оған 1 миллиард теңге қаржы қаралған.
Жол қауіпсіздігін арттыру бағытындағы жұмыстар мұнымен шектелмейді. Қала көлемінде тоқсан сайын жол белгілері жаңартылып, жол таңбалары қайта сызылып, қозғалыс қарқыны жоғары аумақтарға жаңа бағдаршамдар орнатылуда. Бұл шаралар жүргізушілер мен жаяу жүргіншілердің қауіпсіздігін арттыруға, сондай-ақ жол қозғалысын реттеудің тиімділігін күшейтуге мүмкіндік береді.
Соған қарамастан, жол қозғалысы ережелерін сақтамау салдарынан жаяу жүргіншілердің қатысуымен болатын жол-көлік оқиғалары әлі де кездесуде. Статистикалық мәліметтерге сәйкес, биылғы жылдың сегіз айында қала аумағында 575 жол-көлік оқиғасы тіркеліп, өткен жылдың сәйкес кезеңімен салыстырғанда көрсеткіш 17 пайызға төмендеген. Бұл профилактикалық жұмыстардың нәтижесін көрсеткенімен, қауіпсіздік шараларын одан әрі күшейту қажеттігін аңғартады.
Жиында қала әкімі құқық қорғау органдары мен жауапты мекемелердің үйлесімді жұмысын күшейтіп, профилактикалық түсіндіру шараларын жүйелі түрде ұйымдастыруды тапсырды.
– Жол-көлік оқиғаларының алдын алу бағытындағы қауіпсіздікті қамтамасыз етіп, профилактикалық шараларды күшейту қажет. Жаяу жүргіншілерге де, көлік жүргізушілеріне де күн сайын түсіндіру жұмыстары жүргізілуі тиіс. Біз үшін ең басты құндылық – адам өмірі. Сондықтан берілген тапсырмалар сапалы әрі уақытылы орындалуы қажет, – деді Нұржан Сәбитұлы.
Бүгінде қалада «Ақылды қала» және «Қауіпсіз қала» жобалары кезең-кезеңімен жүзеге асырылып келеді. Аталған жобалар аясында жол қозғалысын автоматты бақылау, бейнебақылау жүйелерін кеңейту, интеллектуалды бағдаршамдарды енгізу, көлік ағынын цифрлық талдау және жол-көлік оқиғаларының қаупі жоғары учаскелерді деректер негізінде анықтау бағытындағы жұмыстар қарқын алуда. Бұл шешімдер қала инфрақұрылымын тиімді басқаруға және азаматтардың қауіпсіздігін арттыруға мүмкіндік береді.
Сонымен қатар жауапты сала мамандары жол қозғалысын басқарудың бірыңғай цифрлық платформасын дамыту, инженерлік инфрақұрылымды заманауи талаптарға сәйкестендіру, интеллектуалды көлік жүйелерін енгізу және деректерге негізделген басқару тетіктерін кеңінен пайдалану бойынша жұмыстарды жалғастырады. Мұндай цифрлық шешімдер қала көшелеріндегі қозғалысты оңтайландырып қана қоймай, төтенше жағдайлардың алдын алуға, тұрғындарға қолайлы әрі қауіпсіз қалалық орта қалыптастыруға ықпал етеді.
Қызылорда қаласында жол қауіпсіздігін қамтамасыз ету бағытында қолға алынған кешенді жұмыстар алдағы уақытта да жалғасып, заманауи цифрлық технологияларды енгізу арқылы көлік инфрақұрылымының сапасын жаңа деңгейге көтеруге басымдық берілмек.
