Мерекелік салтанатты шара барысында аудан әкімі Айтбай Жандарбеков мемлекеттік қызметшілерді кәсіби мерекелерімен құттықтап, бұл салада еңбек ететін азаматтардың қоғамдағы орны ерекше екенін атап өтті.
– “Сіздерді кәсіби мерекелеріңіз – Мемлекеттік қызметшілер күнімен шын жүректен құттықтаймын!
Бұл күн – билік пен бұқара халықтың арасын жалғайтын алтын көпірде аянбай қызмет етіп жүрген мемлекеттік қызметшілердің кәсіби мерекесі.
Мемлекеттік қызмет – бір саланы ғана қамтитын мамандық емес. Ол – Мемлекет басшысы Қасым-Жомарт Кемелұлы Тоқаевтың саясатын жергілікті жерде жүзеге асырып, халықпен тығыз байланыс орнатып, елдің мұң-мұқтажына құлақ асып, сол міндеттерді орындауға бағытталған жауапты қызмет. Мемлекеттік қызметшінің еңбегі терең білім мен іскерлікті ғана емес, үлкен жауапкершілікті талап етеді.
Сіздердің табанды қызметтеріңіздің арқасында ауданымыз әлеуметтік-экономикалық даму қарқынын сақтап, түрлі салаларда оң көрсеткіштерге қол жеткізіп келеді. Әсіресе, агроөнеркәсіп саласындағы жетістіктері үшін Шиелі ауданы облыс көлемінде «Үздік аудан» атанып, ал елді мекендерді абаттандыру мен санитарлық тазалықты қамтамасыз ету бағытындағы жүйелі жұмыстардың нәтижесінде Шиелі кенті «Үлгілі аудан орталығы» номинациясына ие болды.
Бұл – аудан тұрғындарының әл-ауқатын арттыруға бағытталған ауқымды жұмыстардың, сондай-ақ Мемлекет басшысының бастамасымен жүзеге асырылып жатқан «Таза Қазақстан» экологиялық акциясы аясында атқарылған игі істердің нақты жемісі.
Өңіріміздің өркендеуі мен көркеюіне қосқан елеулі үлестеріңіз – сіздердің кәсібиліктеріңіз бен елге деген адал қызметтеріңіздің айқын көрінісі.
Баршаңызға зор денсаулық, қажырлы еңбектеріңізге толағай табыс, отбасыларыңызға амандық, бақ-береке мен шаттық тілеймін. Елге қызмет ету жолындағы әрбір қадамдарыңыз жемісті болып, абырой-беделдеріңіз арта берсін!” – деді аудан әкімі.
Айта кетейік, қазіргі таңда Шиелі ауданы әкімдігіне қарасты жергілікті атқарушы органдарда, кент және ауылдық округ әкімдіктерінде барлығы 184 мемлекеттік қызметші ел мүддесі мен халық игілігі жолында абыройлы еңбек етіп келеді.
Мерекелік басқосуда мемлекеттік қызмет саласында адал еңбек етіп, өз қызметіне жауапкершілікпен қараған бірқатар мемлекеттік қызметкерлер облыс әкімінің және аудан әкімінің Алғыс хаттарымен марапатталды.
Салтанатты шара барысында мемлекеттік қызметшілер тек кәсіби біліктіліктерімен ғана емес, өнердегі шеберліктерімен де танылды. Олар әсем ән шырқап, жырдан шашу шашып, әзіл-қалжыңмен көпшіліктің көңілінен шығып, мемлекеттік қызметкерлердің өнерден де алыс емес екендігін көрсетті.
@Шиелі ауданы әкімінің баспасөз қызметі.
