Кештің мақсаты — ұлы ақынның өнегелі өмірін, ғибратты ғұламалығын, дара жолын насихаттау, жас ұрпаққа Абай мұрасын тереңірек таныту.
Рухани кешке арнайы қатысқан партияның облыстық филиалының төрағасы Алмасбек Есмаханов жас оқырмандармен ұлы ақын жайында әңгіме өрбітіп, Абай шығармашылығының тереңдігін бүгінгі күнмен байланыстары келе оның өлеңдерінен үзінді де оқыды.
“Абай – біздің ұлттық кодымыздың алтын арқауы. Оның әрбір сөзі – тәрбиелік мәні терең, ғасырлар бойы құндылығын жоғалтпайтын рухани қазына. Бүгінгі жастар Абайды оқу арқылы өз-өзін, қоғамды, адамгершілікті тануға ұмтылады,” – деп атап өтті төраға Алмасбек Есмаханов.
Сондай-ақ шарада Ә.Тәжібаев атындағы облыстық әмбебап ғылыми кітапханасының кітапханашысы Изанелья Ақтай жастармен өз ой-пікірлерімен бөлісіп, Абай мұрасының бүгінгі күнмен үндестігін атап өтті.
Әдеби кешке қатысушылар Абайдың шығармаларынан үзінділер оқып, оның өлеңдеріндегі терең мағына мен ғибратты ойлар туралы пікір алмасты.
Кездесу рухани серпіліс сыйлап, қатысушыларға ұлттық болмысымыздың темірқазығы — Абай мұрасын жаңаша қырынан тануға мүмкіндік берді.
#AMANAT
