Президент саябағында өткен салтанатты кеште бұқаралық спортты дамыту, салауатты өмір салтын қалыптастыру және спорт саласын цифрландыру бағытында атқарылып жатқан жұмыстар кеңінен насихатталды.
Мерекелік жиын барысында спорт саласының дамуына елеулі үлес қосып жүрген ардагерлер мен мамандарға, сондай-ақ жас спортшыларды тәрбиелеуге атсалысып жүрген азаматтарға құрмет көрсетілді. Оларға облыс әкімінің Алғыс хаттары мен Қызылорда қаласының ең жоғары марапаты – «Құрмет грамотасы» табысталып, көп жылғы еңбектері лайықты бағаланды.
Салтанатты шараға қатысқан қала әкімінің орынбасары Еркін Турабаев жиналған қауымды кәсіби мерекемен құттықтап, өңірде бұқаралық спортты дамыту, жастарды дене шынықтыруға баулу және спорттық инфрақұрылымды жетілдіру бағытында жүйелі жұмыстар жүргізіліп жатқанын атап өтті. Сонымен қатар мемлекет басшысы айқындаған салауатты ұлт қалыптастыру міндетін жүзеге асыруда спорт саласының маңызы ерекше екеніне тоқталды.
Іс-шара барысында марапат иелері көрсетілген құрмет үшін алғыстарын білдіріп, алдағы уақытта да жас ұрпаққа үлгі болып, ел спортының дамуына өз үлестерін қоса беретіндерін жеткізді.
Кештің мәдени бағдарламасы көркем гимнастика шеберлерінің әсерлі қойылымдарымен және заманауи би ұжымдарының өнерімен жалғасты. Сонымен бірге қала тұрғындары арасында түрлі спорттық эстафеталар, көңілді жарыстар мен белсенді ойындар ұйымдастырылып, көпшілік салауатты өмір салтын насихаттайтын шараларға белсене қатысты.
Шара аясында спорт саласындағы цифрландыру бағытында жүзеге асырылып жатқан бастамаларға да назар аударылды. Бүгінде өңірде тұрғындардың спорт нысандары туралы ақпаратқа қолжетімділігін арттыру, спорттық іс-шаралар жөніндегі мәліметтерді электронды платформалар мен әлеуметтік желілер арқылы жедел тарату, жарыстардың нәтижелерін цифрлық форматта жариялау және бұқаралық спортты заманауи ақпараттық технологиялардың көмегімен кеңінен насихаттау жұмыстары кезең-кезеңімен жүзеге асырылып келеді. Бұл тұрғындардың спорттық өмірге белсенді араласуына және мемлекеттік қызметтердің қолжетімділігін арттыруға мүмкіндік беруде.
Мерекелік кеш концерттік бағдарламамен жалғасып, жергілікті өнерпаздар мен спортшылар өз өнерлерін көпшілік назарына ұсынды. Әсем ән мен әсерлі қойылымдарға толы кештің соңы мерекелік отшашумен қорытындыланып, Спорт күніне арналған айтулы шараның жарқын нүктесіне айналды.
