2026 жылғы 21 маусымда Қазақстан Республикасының «Сайлау туралы» Конституциялық заңы негізінде өткен сайлау қорытындысына сәйкес, Шиелі кентінің әкімі болып Өмірәлі Аманкелді Шералыұлы, ал Жиделіарық ауылдық округінің әкімі болып Әбілдашев Ерлан Шазатұлы сайланды.
Актив отырысында аудан басшысы жаңадан сайланған әкімдерді құттықтап, халық сенімін ақтап, өңірдің әлеуметтік-экономикалық дамуына үлес қосып, ел игілігі жолында абыройлы қызмет атқаратынына сенім білдірді.
Өмірәлі Аманкелді Шералыұлы 1979 жылы 7 шілдеде Қызылорда облысы, Шиелі ауданында дүниеге келген. Жоғары білімді.
2003 жылы Оңтүстік Қазақстан Ашық университетін құқықтану мамандығы бойынша тәмамдаған.
Еңбек жолын 1996 жылы Шиелі аудандық балалар және жасөспірімдер спорт мектебінде жаттықтырушы болып бастаған. Әр жылдары білім беру саласында, Кентау Қазақ кәсіптік колледжінде түрлі басшылық қызметтер атқарған.
2017-2022 жылдары Талаптан ауылдық округінің әкімі болды.
2022 жылдың қыркүйек айынан бастап осы уақытқа дейін Шиелі кентінің әкімі қызметін атқарып келді.
Әбілдашев Ерлан Шазатұлы 1974 жылы 12 наурызда Қызылорда облысы, Шиелі ауданы, Жиделіарық ауылында дүниеге келген. Жоғары білімді.
1997 жылы Әл-Фараби атындағы Қазақ мемлекеттік ұлттық университетін биология пәні мұғалімі мамандығы бойынша бітірген.
Еңбек жолын 1991 жылы Н.Бекежанов атындағы колхозда бастаған. Кейін білім беру саласында ұзақ жылдар еңбек етіп, №206 «Жиделіарық» орта мектебінде мұғалім, директордың орынбасары, мектеп директоры қызметтерін атқарған.
2018 жылдың шілде айынан бастап Жиделіарық ауылдық округінің әкімі қызметін атқарып келеді.
Жиын соңында аудан әкімі жаңадан сайланған әкімдерге жауапты қызметтеріне табыс тілеп, тұрғындардың әл-ауқатын арттыруға бағытталған жұмыстарды сапалы әрі нәтижелі жүзеге асыру қажеттігін атап өтті.
@Шиелі ауданы әкімінің баспасөз қызметі.
