Аталған шараға аудан әкімінің орынбасары Ғалымжан Рахатов, аудан прокуроры Талған Бектұрсынов, аудандық полиция бөлімінің бастығы Мақсат Баймағанбетов, Мәдениет ауылдық округінің әкімі Ардақ Оразбаев және ауыл тұрғындары қатысты.
Жоба аясында Жалағаш ауданындағы барлық 14 ауылдық округ толықтай алкогольден бас тартқан елді мекендер қатарына қосылып отыр. Бұл – аудан көлемінде қоғамдық тәртіпті нығайтуға, құқықбұзушылықтың алдын алуға және салауатты өмір салтын қалыптастыруға бағытталған жүйелі жұмыстардың нақты нәтижесі.
Айта кету керек, Жалағаш аудандық прокуратурасының бастамасымен аудан аумағындағы барлық ауылдық округтерде «Алкогольсіз ауыл» жобасын кезең-кезеңімен жүзеге асыру бағытында кешенді жұмыстар жүргізілді.
Жүргізілген талдау нәтижесінде соңғы бес жылда ауданда масаң күйде жасалған 80 қылмыс тіркелгені анықталған. Осыған байланысты тұрғындар арасында арнайы сауалнама ұйымдастырылып, ауыл халқының 87 пайызы аталған бастаманы қолдаған.
Қабылданған шаралар өз нәтижесін беруде. Атап айтқанда, 2026 жылдың алғашқы төрт айының қорытындысы бойынша масаң күйде жасалған қылмыстар саны өткен жылдың сәйкес кезеңімен салыстырғанда 55 пайызға төмендеп, 9 деректен 4 жағдайға дейін азайған.
Сонымен қатар, заңсыз алкоголь өнімдерін сатумен айналысқан тұлғаларға қатысты заң талаптарына сәйкес тиісті шаралар қабылданып, жауапкершілікке тартылуда.
Аталған бастама – қоғамда құқықтық мәдениетті қалыптастыруға, тұрғындардың қауіпсіздігін қамтамасыз етуге және жастар арасында салауатты өмір салтын насихаттауға бағытталған маңызды жобалардың бірі болып табылады.
