Шараға аудан әкімінің орынбасары Ғани Сүлейменов, аудандық мәслихат төрағасы Өмірзақ Елеусінов, Қазақстанның Еңбек Ері Имамзада Шағыртаев, сондай-ақ, қайраткермен бірге қызметте болған замандастары, облыстан арнайы келген зиялы қауым өкілдері және сала ардагерлері қатысты.
Конференцияға қатысушылар алдымен аудандық тарихи-өлкетану музейіндегі арнайы көрмені тамашалап, қайраткердің өмір жолымен танысты. Конференция «Өнегелі өмірдің өшпес ізі» тақырыбында өтіп, тұлғаның ғибратты ғұмыры туралы бейнекөрсетіліммен басталды.
Жиында баяндамашылар Қаһарман Табынбаевтың тағылымды өмір жолы мен елге сіңірген еңбегін кеңінен баяндап, оның тұлғалық болмысы мен елге қызмет етудегі үлгісін атап өтті.
Сондай-ақ, шара соңында қайраткердің ұрпақтары ұйымдастырушыларға алғыстарын білдірді.
