Жеке қабылдауға келген тұрғындар негізінен тұрғын үй алу, жер телімін рәсімдеу, тұрақты жұмысқа орналасу, әлеуметтік көмек мәселелері мен инфрақұрылымға қатысты сауалдарын ортаға салды. Қабылдау барысында аудан басшысы әрбір азаматтың мәселесіне жеке тоқталып, заң талаптарына сәйкес түсіндіру жұмыстарын жүргізді. Сонымен қатар көтерілген мәселелердің шешу жолдары қарастырылып, жауапты сала басшыларына нақты тапсырмалар берілді.
Әсіресе жұмыссыздық мәселесі бойынша өтініш білдірген азаматтарға аудандағы мекемелер мен кәсіпкерлік нысандарындағы бос жұмыс орындары ұсынылды. Бұдан бөлек, тұрғындарға қоғамдық жұмыстарға тартылу, қысқа мерзімді кәсіптік оқыту және қайта даярлау курстарына қатысу мүмкіндіктері түсіндірілді. Бұл бағыттағы жұмыстар аудан көлемінде жүйелі түрде жүзеге асырылып жатқаны айтылды.
Ал тұрғын үй мәселесі бойынша қабылдауға келген азаматтарға қолданыстағы заңнамаға сәйкес кезек тәртібімен тұрғын үй беру жұмыстары жүргізілетіні түсіндірілді. Сондай-ақ тұрғындардың өтініштері мен ұсыныстары назарға алынып, тиісті сараптамалық зерттеулер жүргізілгеннен кейін заң талаптарына сай нақты шешімдер қабылданатыны жеткізілді.
Қабылдау соңында аудан әкімі тұрғындардың мәселелерін назардан тыс қалдырмай, әрбір өтініштің заң аясында қаралатынын атап өтті. Сонымен қатар жауапты мекеме басшыларына азаматтардың көтерген мәселелерін бақылауға алып, тиісті жұмыстар жүргізуді тапсырды.
Айта кетейік, аудан әкімінің жеке қабылдауына eGov.kz порталы, e-Otinish жүйесі арқылы немесе аудан әкімдігіне келіп жазбаша өтініш беру арқылы жазылуға болады.
@Шиелі ауданы әкімінің баспасөз қызметі.
