Аптаның жұма күнгі кездесулерінде аудан әкімі Мемлекет басшысы мен Үкіметтің қолдауымен аудан көлемінде жүзеге асырылып жатқан ауқымды жобаларға, әлеуметтік-экономикалық даму көрсеткіштеріне және алдағы жоспарларға кеңінен тоқталды. Сонымен қатар, елді мекендердің инфрақұрылымын жақсарту, халықтың тұрмыс сапасын арттыру, ауылдарды көркейту бағытындағы жұмыстар жүйелі түрде жалғасатынын атап өтті.
Талаптан ауылдық округінде жыл басынан бері 17 жұмыссыз азамат ақылы қоғамдық жұмыстарға тартылып, тұрақты табыс табуына мүмкіндік жасалды. Бүгінде атаулы әлеуметтік көмек алушылар тіркелмеген. Ауылдың инфрақұрылымын дамыту мақсатында М.Кеншімбаев, Талаптан және Назембау көшелеріне ағымдағы жөндеу жұмыстарын жүргізу, сондай-ақ Б.Палымбетов көшесіндегі электр бағаналарын ауыстырып, қосымша трансформатор орнату бойынша жобалық-сметалық құжаттар әзірленіп, аталған жобаларды іске асыру үшін аудандық экономика және қаржы бөліміне тиісті қаржыға өтінім ұсынылған.
Сонымен қатар, өндірістік және тұрмыстық қатты қалдықтарды орналастыруға арналған 2 гектар жер қоршалып, санитарлық талаптарға сай ретке келтірілген.
Бәйгеқұм ауылдық округінде ауылішілік каналдар мен арықтар толықтай қазылып, топырақтардан тазартылған. Бұл жұмыстар егістік алқаптарын сумен қамтамасыз ету мен санитарлық тазалықты сақтау мақсатында жүргізілген. «Таза Қазақстан» экологиялық акциясы аясында Бәйгеқұм ауылының кіреберіс бөлігі абаттандырылып, арнайы қоршаулар орнатылып, ағаш көшеттері егілген. Сонымен қатар, туристік әлеуеті жоғары “Ханқожа” көлін толтыру жұмыстары жүргізілуде. Ауылішілік электр желілерін толық жаңарту жұмыстары да қарқынды жүзеге асуда.
Жөлек ауылдық округінде де бірқатар маңызды жобалар қолға алынған. Бүгінде ауылда заманауи спорт кешенінің құрылысы жүргізілуде. Сонымен қатар, жер асты арқылы ауыз су құбырлары тартылып, электр қуатын тұрақты қамтамасыз ету үшін трансформатор мен қосымша генератор сатып алынған.
Сондай-ақ, Шиелі аудандық тұрғын үй-коммуналдық шаруашылығы және автомобиль жолдары бөлімі арқылы қоғамдық көлік қатынасын ұйымдастыруға конкурс өткізіліп, жеңімпаз анықталды. Бүгінде ауылішілік маршрут келісіліп, 18 мамырдан бастап “Шиелі – Жөлек” бағытында қоғамдық көлік қатынайтын болады.
Кездесу барысында аудан прокуроры Мейрамбек Маханбетжанов «Заң және тәртіп» қағидаты аясында құқықтық мәдениетті қалыптастыру, интернет-алаяқтықтың, есірткі қылмыстарының, тұрмыстық зорлық-зомбылықтың алдын алу бағытында түсіндірме жұмыстарын жүргізіп, тұрғындарды заң талаптарын сақтауға шақырды.
Кездесулер барысында ауыл тұрғындары өз ұсыныс-пікірлерін ортаға салып, ауылдардың әлеуметтік-экономикалық дамуына қатысты өз ойларын жеткізді. Аудан әкімі көтерілген мәселелердің барлығы кезең-кезеңімен шешімін табатынын айтып, халықпен кері байланыс пен ашық диалог әрдайым басты назарда болатынын жеткізді. Сонымен қатар, кездесуде айтылған ұсыныс-пікірлер бойынша тиісті сала басшыларына нақты тапсырмалар жүктеп, әр мәселенің заң аясында әрі мерзіміне сәйкес орындалуын қатаң бақылауға алуды тапсырды.
@Шиелі ауданы әкімінің баспасөз қызметі.
