Кездесулер барысында аудан басшысы Мемлекет басшысы мен Үкіметтің қолдауымен аудан көлемінде жүзеге асып жатқан ауқымды жобалар мен әлеуметтік-экономикалық даму көрсеткіштеріне кеңінен тоқталып, алдағы жоспарлармен бөлісті.
Атап айтқанда, Майлытоғай ауылдық округінде кәсіпкерлікті дамыту бағытында жүйелі жұмыстар жүргізілуде. Ауылдың инфрақұрылымы мен көркейту-көгалдандыру бағытындағы жұмыстар да қарқынды жүзеге асуда. 9 шақырымды құрайтын Тұрымбет каналы қайта қазылып, санитарлық тазалау жұмыстары жүргізілді. Ауылдың кіреберісіне «Мәңгілік мекенім – Майлытоғай» жазуы орнатылып, елді мекеннің көркі айшықтала түсті. Экологиялық жағдайды жақсарту және санитарлық тазалықты сақтау мақсатында мемлекет бюджеті есебінен 3 миллион теңгеге қатты тұрмыстық қалдықтар төгетін арнайы полигон салынды.
Алдағы уақытта ауылдың әлеуметтік жағдайын жақсарту, инфрақұрылымды жаңғырту, жастарды қолдау, санитарлық тазалық пен абаттандыру жұмыстарын жалғастыру басты назарда болатыны айтылды.
Сұлутөбе ауылдық округіндегі кездесуде де тұрғындар ауылда атқарылып жатқан жұмыстарға ризашылықтарын білдіріп, аудан басшылығына қолдау көрсететіндіктерін жеткізді.
Атап айтқанда, ауылдық округте түнгі жарықтандыру мәселелері кезең-кезеңімен шешімін тауып келеді. Аяқ сумен қамтамасыз ету мақсатында «Құмжарған» каналын қазу жұмыстары басталды. 1 Мамыр елді мекенінің кіреберісіне төлқұжат орнатылып, балалар ойын алаңы салынды. Сонымен қатар, Тәуелсіздік, Сырдария, Астана, Алаш, Атамекен, Жаңақұрылыс, Бәйтерек, Тасшоқы және Құмсуат көшелеріне көше жарықтары орнатылды.
Ауыл тұрғындарымен кездесу барысында аудан прокуроры Мейрамбек Маханбетжанов “Заң және тәртіп” қағидаты аясында құқықтық мәдениетті қалыптастыру, интернет алаяқтықтың, есірткі қылмыстарының, тұрмыстық зорлық-зомбылықтың алдын алу бағытында түсіндірме жұмыстарын жүргізіп, тұрғындарды заң талаптарын сақтауға шақырды.
Кездесу барысында тұрғындар өз ұсыныс-пікірлерін ортаға салып, ауылды дамыту бағытындағы жұмыстарға қолдау білдірді. Аудан әкімі көтерілген мәселелер назардан тыс қалмайтынын айтып, оларды кезең-кезеңімен шешу үшін тиісті шаралар қабылданатынын жеткізді.
@Шиелі ауданы әкімінің баспасөз қызметі.
