Мерекелі күні аудан перзентханасында өмірге келген 4 ұл және 1 қыз баланың аналарына арнайы құттықтау ұйымдастырылып, олардың отбасыларына сый-сияпаттар табысталды. Сәбилі болған отбасыларды аудан әкімінің орынбасары Болатбек Ысмағұлов пен аудандық қоғамдық даму бөлімінің басшысы Кенжехан Есенбаев арнайы барып құттықтап, жақсы тілектерін жеткізді.
Кездесу барысында жас аналардың жағдайы сұралып, жаңа өмірге келген сәбилердің амандығы мен денсаулығына тілектестік білдірілді. Сонымен қатар, отбасы құндылығының қоғамдағы орны ерекше екені айтылып, мемлекет тарапынан аналар мен балаларға көрсетіліп жатқан қолдаулар жөнінде де сөз қозғалды.
Шара барысында ұйымдастырушылар бұл бастаманың басты мақсаты – отбасы институтын нығайту, аналарға құрмет көрсету және дүниеге келген әрбір сәбидің өмірге келу қуанышын елмен бірге бөлісу екенін атап өтті. Себебі отбасы – қоғамның тірегі, ал ана мен бала амандығы – мемлекет саясатының басым бағыттарының бірі.
Осындай игі шаралар арқылы жас отбасыларға қолдау білдіріліп, ұлттық құндылықтарды дәріптеу мен отбасы мәртебесін арттыруға ерекше көңіл бөлінуде. Халықаралық отбасы күніне арналған бұл мерекелік іс-шара аудан тұрғындарына көтеріңкі көңіл-күй сыйлап, ізгілік пен мейірімнің жарқын үлгісіне айналды.
