Іс-шараның негізгі мақсаты – тұрғындардың кене арқылы таралатын аса қауіпті жұқпалы ауру жөніндегі ақпараттық сауаттылығын арттыру және аурудың алдын алу шараларын кеңінен насихаттау. Кездесу барысында медицина мамандары Конго-Қырым геморрагиялық қызбасының адам денсаулығына тигізетін зияны, аурудың негізгі белгілері, жұғу жолдары мен қорғану тәсілдері туралы жан-жақты түсіндіріп өтті.
Медицина қызметкерлерінің айтуынша, көктем мен жаз мезгілдерінде кененің белсенділігі артып, табиғат аясында демалушылар мен мал шаруашылығымен айналысатын азаматтар үшін қауіп күшейеді. Осыған байланысты тұрғындарға табиғатқа шыққанда жабық әрі ашық түсті киім кию, шалбардың балағын шұлықтың ішіне салу, денені және киімді жиі тексеріп тұру қажеттігі ескертілді.
Сонымен қатар мамандар кене шаққан жағдайда оны өз бетінше жұлып тастауға болмайтынын айтып, дереу медициналық мекемеге жүгіну қажеттігін түсіндірді. Уақытылы көрсетілген дәрігерлік көмек қауіпті инфекциялардың алдын алуда маңызды рөл атқаратыны атап өтілді.
Түсіндіру жұмыстары барысында тұрғындарға арнайы ақпараттық үнпарақшалар таратылып, аула мен мал қораларын санитарлық талаптарға сай таза ұстау, шөптерді уақытылы ору және залалсыздандыру жұмыстарын жүргізу бойынша кеңестер берілді.
Шара соңында медицина қызметкерлері халықты өз денсаулығына бейжай қарамауға, сақтық шараларын қатаң сақтауға және кене шағу жағдайында уақыт оздырмай дәрігер көмегіне жүгінуге шақырды.
