Шиелі ауданы әкімінің 2026 жылғы 13 ақпандағы №38-Ө өкімінің 3-қосымшасына сәйкес құрылған арнайы жұмысшы тобы Ақмая елді мекенінде атқарылып жатқан кенеге қарсы өңдеу жұмыстарының жүргізілу барысын тексерді.
Жұмысшы топ құрамында Шиелі аудандық санитариялық-эпидемиологиялық бақылау басқармасының бас маманы Н.Оспанов, Шиелі аудандық ветеринариялық станциясының Ақмая ветеринариялық пунктінің ветеринар маманы Қаншегиров Нұрғиса, санитариялық қызмет маманы Байділдәұлы Ж., Ақмая ауылдық округі әкімдігі аппаратының бас маманы Жәнібекұлы Қазбек, «Ala comfort» ЖШС-нің өкілі Оқбаев Қ., сондай-ақ «Жұмылдыру дайындығы және шұғыл жұмыстар орталығы» КММ-нің Шиелі ауданы бойынша өкілі Мусаев К. болды.
Мамандардың мәліметінше, өңдеу жұмыстары арнайы «Ципертин» дәрісін қолдану арқылы жүргізілуде. Залалсыздандыру шаралары барысында қауіпсіздік талаптары толық сақталып, мамандар арнайы қорғаныс киімдерімен, резеңке етікпен, қолғаппен, бетперде және қорғаныш көзілдірігімен қамтамасыз етілген.
Кенеге қарсы өңдеу жұмыстарының сапалы әрі тиімді жүргізілуіне ветеринария саласының мамандары мен ауылдық округ қызметкерлері бірлесіп атсалысуда. Жұмыс барысында өңдеу аумақтары мұқият бақылауға алынып, санитариялық талаптардың орындалуына ерекше назар аударылуда.
Сонымен қатар, ауыл тұрғындарымен кездесулер ұйымдастырылып, Конго-Қырым геморрагиялық қызбасының алдын алу жолдары, кене шаққан жағдайда алғашқы әрекеттер және жеке бас гигиенасын сақтау бойынша түсіндірме жұмыстары жүргізілді. Тұрғындарға арнайы ақпараттық үнпарақтар таратылып, сақтық шараларын сақтау қажеттігі ескертілді.
Мамандар мұндай профилактикалық жұмыстар аудан аумағында кезең-кезеңімен жалғасатынын атап өтті.
