Маңызды басқосу барысында кәсіпкерлерді қолдау, инвестициялық ахуалды жақсарту, мемлекеттік бағдарламалардың тиімділігін арттыру және бизнес субъектілерінің құқықтарын қорғау мәселелері кеңінен сөз болды. Жиын «Кеңесіп пішкен тон келте болмас» қағидатына сай ашық пікір алмасу форматында ұйымдастырылып, мемлекеттік органдар мен кәсіпкерлер арасында өзара байланыс орнатуға мүмкіндік берді.
Арман мәдениет үйінде өткен кездесуге аудан прокуроры, аудан әкімінің орынбасары, Қызылорда облысы Кәсіпкерлер палатасының өңірлік кеңес мүшелері, мемлекеттік мекеме басшылары, сала мамандары және аудан кәсіпкерлері қатысты. Кездесу барысында кәсіпкерлер тарапынан көтерілген түйткілді мәселелер тыңдалып, оларды шешу жолдары талқыланды.
Әсіресе, кәсіп ашуға ниетті азаматтарды қолдау, қаржыландыру тетіктері, инфрақұрылым мәселелері, жер алу, электр желілеріне қосылу, салықтық жеңілдіктер мен мемлекеттік бағдарламаларға қолжетімділік тақырыптары күн тәртібінде болды. Сонымен қатар, кәсіпкерлердің құқықтарын қорғау және тексеру жұмыстарын заң аясында жүргізу мәселесіне де ерекше назар аударылды.
Жиын барысында сала өкілдері өз ұсыныс-пікірлерін еркін айтып, нақты сауалдарын жауапты мекеме басшыларына жолдады. Өз кезегінде құзырлы органдар тарапынан заң аясында түсіндірме беріліп, бірқатар мәселелер бойынша нақты міндеттер жүктелді.
Көшпелі отырыс аясында «Халық үніне құлақ асатын мемлекет» тұжырымдамасының маңыздылығы да айқын көрініс тапты. Ашық диалог алаңына айналған бұл кездесу кәсіпкерлер мен мемлекеттік органдар арасындағы байланысты нығайтып, бизнестің дамуына қолайлы орта қалыптастыруға серпін берді.
Сонымен қатар, жиында прокуратура органдарының кәсіпкерлердің құқықтарын қорғаудағы рөлі ерекше аталып өтті. Кәсіп иелері құқықтық қолдау көрсетіп, заң аясында әділ шешім қабылдауға ықпал етіп жүрген жауапты сала мамандарына ризашылықтарын білдірді.
Мұндай кездесулер алдағы уақытта да жалғасып, кәсіпкерлердің ұсыныстары мен мәселелерін шешуге бағытталған нақты жұмыстар кезең-кезеңімен жүзеге асырылатын болады.
