Оқу жылының аяқталуына орай өткізілген ауқымды рейдтік шараға аудан әкімі Алмасбек Есмаханов арнайы қатысып, рейд барысын бақылауға алды. Рейдтік топтарға жасөспірімдердің қауіпсіздігін қамтамасыз ету, құқық бұзушылықтардың алдын алу бағытындағы жұмыстарды жүйелі әрі бірлесіп жүргізудің маңыздылығын атап өтті. Мұнымен қоса рейд жұмыстары барысында санитарлық-тазалық мәселесінде назардан тыс қалдырмау керектігін ескертті.
-Мемлекет басшысы Қасым-Жомарт Тоқаев «Заң мен тәртіп» қағидатын қоғам дамуының басты бағыты ретінде айқындап берді. Сондықтан жастар тәрбиесі мен жасөспірімдер қауіпсіздігіне бейжай қарауға болмайды. Әсіресе оқу жылы аяқталған кезеңде балалардың беймезгіл уақытта қараусыз жүруінің алдын алып, ата-аналармен, білім беру ұйымдарымен және құқық қорғау органдарымен бірлесе жұмыс жүргізуіміз қажет. Бұл – баршамызға ортақ міндет, – деді аудан әкімі.
Күшейтілген рейд жұмыстарына аудан әкімінің орынбасары Дәурен Тлеумбетов, аудандық полиция бөлімінің Нұрлан Ибраев, аудан прокурорының орынбасары Биқожа Жұмаш, аудандық білім бөлімінің басшысы Әділхан Жөлекешов, учаскелік полиция инспекторлары мен аудандық білім бөлімінің қызметкерлері, мектеп директорлары жұмылдырылды.
Рейд барысында арнайы топтар аудан аумағындағы ойын-сауық орындарын, мейрамханалар мен кафелерді аралап, кәмелетке толмаған жасөспірімдердің түнгі уақытта заңды өкілінсіз жүруіне болмайтындығын түсіндірді.
Сондай-ақ заң талаптарын бұзу деректері бойынша тиісті профилактикалық шаралар қабылданып, ата-аналарға ескертулер берілді. Кәсіпкерлік нысан иелеріне де жасөспірімдерге қатысты қолданыстағы талаптар кеңінен түсіндірілді.
Жастар қауіпсіздігін қамтамасыз ету, құқық бұзушылықтың алдын алу және қоғамда заң талаптарын сақтау мәдениетін қалыптастыру бағытындағы рейдтік жұмыстар аудан орталығы мен барлық ауылдық округтерде жалғасты.
