Кездесу барысында «Қазақстан темір жолы» ұлттық компаниясының демеушілігімен бой көтеріп жатқан әлеуметтік нысандардың құрылыс жұмыстарымен танысып, құрылысқа жауапты «Иман» ЖШС өкілдерімен пікір алмасты. Құны 1 млрд теңгені құрайтын ауқымды жоба қазан айына дейін толық аяқталып, ел игілігіне беріледі деп күтілуде.
«ҚТЖ-Жүк тасымалы» ЖШС бас директоры Асан Үмбетов өз сөзінде аталған нысандар ауыл балаларына жаңа мүмкіндіктер ашып, олардың білім мен руханиятты қатар меңгеруіне зор ықпал ететінін атап өтті. Сонымен қатар, құрылыс жұмыстары толық аяқталғанға дейін тұрақты бақылауда болатынын айтып, мердігер мекеме өкілдеріне жұмысты сапалы жүргізуді тапсырды.
Аудан әкімі Аманжол Сақыпұлы да ғимараттардың сапалы әрі талапқа сай салынуына жергілікті әкімдік тарапынан ерекше мән берілетінін жеткізіп, нысандар толық пайдалануға берілгенге дейін қажетті қолдау көрсетілетінін айтты.
Сонымен қатар, кенттегі теміржол саласына қатысты өзекті мәселелер де көтерілді. Аудан әкімі кезінде «Қазақстан темір жолы» ұлттық компаниясы қаржыландырып, алайда құрылысы аяқталмай қалған тұрғын үйлердің қазіргі таңда аудан меншігіне алынғанын, әлі де құжаттандыру жұмыстарындағы бірқатар кемшіліктерді шешуге аталған компания тарапынан ықпал жасалса деген ұсыныс айтты.
Сондай-ақ, аудан әкімі Аманжол Сақыпұлы Сексеуілдегі «Қамқор Локомотив» жөндеу депосы тарапынан жүргізілген қысқарту жұмыстарының да бүгінде өзекті екенін, аталған жағдайды назардан тыс қалдырмай, қысқарған жұмысшыларды жұмыссыз қалдырмауға жағдай жасалса деген ұсынысын жеткізді.
Өз кезегінде «ҚТЖ-Жүк тасымалы» ЖШС бас директоры А.Үмбетов бұл мәселені шешу бойынша алдағы уақытта кезең-кезеңімен тиісті жұмыстар жүргізілетінін айтты.
Мұнан соң тараптар кентте жаңадан салынып жатқан теміржол вокзалының құрылысымен танысты. Жолаушыларды қабылдау сыйымдылығы 60 адамды құрайтын жаңа вокзалдың құрылысы қарқынды жүргізілуде. Қазіргі таңда ғимараттың негізгі құрылыс жұмыстары аяқталуға жақын, ішкі әрлеу жұмыстары жалғасып жатыр.
Заманауи талаптарға сай бой көтеріп жатқан жаңа вокзал алдағы уақытта кенттің көркін арттырып, жолаушыларға сапалы қызмет көрсететін болады.
Кездесу барысында аудан әкімі Арал қаласы мен Сексеуіл кентіндегі теміржол арқылы өтетін жаяу жүргіншілер өткелдерінің тозығы жеткенін айтып, оларды күрделі жөндеуден өткізу қажеттігін «ҚТЖ-Жүк тасымалы» ЖШС басшылығының назарына ұсынды.
Сондай-ақ Сексеуіл–Қарақұм–Жезқазған бағытындағы теміржол желісі бойындағы Абай станциясына жолаушылардың қауіпсіз әрі ыңғайлы мініп-түсуіне мүмкіндік беретін теміржол перронын салу мәселесін көтерді. Бұл ұсыныс бұған дейін де «Қазақстан темір жолы» ұлттық компаниясының басшылығына жолданып, назарға алынған болатын.
Өз кезегінде «ҚТЖ-Жүк тасымалы» ЖШС бас директоры Асан Ізтілеуұлы аудан әкімі тарапынан көтерілген мәселелердің орынды екенін, ел игілігі жолындағы бастамаларға әрдайым қолдау көрсетілетінін жеткізді
