Мерекелік кеш барысында аудан тұрғындары мен жас жеткіншектерге түрлі мәдени-танымдық бағдарламалар ұсынылып, балалардың шығармашылық және зияткерлік қабілеттерін дамытуға бағытталған шаралар өткізілді
Салтанатты жиында Шиелі ауданының әкімі Айтбай Жандарбеков сөз сөйлеп, ауданның барлық бүлдіршіндерін Халықаралық балаларды қорғау күнімен құттықтады. Аудан басшысы өз сөзінде балалардың жарқын болашағы үшін мемлекет тарапынан жасалып жатқан қолдауларға тоқталып, өскелең ұрпақтың сапалы білім алып, жан-жақты дамуына қолайлы жағдай жасау әрқашан басты назарда екенін атап өтті. Сонымен қатар жас буынға зор денсаулық, бақытты балалық шақ және оқуда табыс тіледі.
Мерекелік бағдарлама аясында Шиелі аудандық кітапханасы арнайы көшпелі кітапхана ұйымдастырып, балаларға қызықты кітаптар мен танымдық әдебиеттерді ұсынды. Кітап көрмесінде қазақ және әлем әдебиетінің таңдаулы туындылары қойылып, жас оқырмандардың кітап оқуға деген қызығушылығын арттыруға ерекше мән берілді.
Шара барысында аудандық кітапхана ұжымы «Еркетай» қуыршақ театрының қызықты қойылымын сахналады. Кейіпкерлердің әсерлі бейнесі мен тәрбиелік мәні зор көріністері балалардың көңілінен шығып, олардың ерекше ықыласына бөленді. Қуыршақ театры бүлдіршіндерге көтеріңкі көңіл-күй сыйлап қана қоймай, достық, мейірімділік және адамгершілік құндылықтарды насихаттады.
Сонымен қатар мерекеде заманауи технологиялардың мүмкіндіктері де таныстырылды. Кітапхана қызметкерлері жасанды интеллект негізіндегі жаңа жобалар мен цифрлық ресурстарды көрсетіп, балаларға олардың жұмыс істеу ерекшеліктерін түсіндірді. QR-кодтар мен арнайы мобильді қосымшалар арқылы жанданатын суреттер, интерактивті кітаптар мен түрлі танымдық материалдар көпшіліктің қызығушылығын тудырды. Балалар цифрлық технологиялардың мүмкіндіктерімен танысып, білім мен ғылымға деген қызығушылықтарын арттырды.
Мерекелік іс-шара барысында балалар түрлі ойын-сауық бағдарламаларына қатысып, ерекше әсерге бөленді. Осындай игі бастамалар жас ұрпақтың шығармашылық әлеуетін дамытуға, олардың бос уақытын тиімді ұйымдастыруға және кітап оқуға деген сүйіспеншілігін қалыптастыруға зор ықпал етеді.
Халықаралық балаларды қорғау күніне арналған мерекелік шара бүлдіршіндерге қуаныш сыйлап, олардың жарқын күлкісі мен шат көңіл-күйіне толы есте қаларлық мерекеге айналды.
