Мерекелік шараға Шиелі аудан әкімі Айтбай Жандарбеков қатысып, лагерьге жолдама алған оқушыларды құттықтап, оларға көтеріңкі көңіл күй, қызықты демалыс пен жарқын естеліктер тіледі.
– “Балалардың алаңсыз демалып, денсаулығын нығайтып, жаңа достар тауып, жан-жақты дамуына жағдай жасау — басты міндеттердің бірі. «Сыр ұланы» лагерінде өткізетін әрбір күндеріңіз мазмұнды да әсерлі болып, жарқын жетістіктерге жетелей берсін,” – деді аудан әкімі.
Ауданымызда 2026 жылдың жаз мезгілінде оқушылардың бос уақытын тиімді ұйымдастыруға бағытталған кешенді іс-шаралар жоспары жүзеге асырылуда. Осы жұмыстар аясында «Сыр ұланы» жазғы тынығу лагері биыл 7 ауысым бойынша жұмыс жүргізіп, жалпы 700 оқушыны қабылдайды. Әр ауысымда 100 баланың демалуына мүмкіндік қарастырылған.
Лагерьде балалардың қауіпсіздігіне ерекше мән берілген. Демалушылардың сапалы тамақтануы, санитарлық-гигиеналық талаптардың сақталуы, медициналық қызмет көрсету және тәрбиелік жұмыстар тұрақты бақылауда болады. Сонымен қатар лагерь аумағында балалардың белсенді демалысын ұйымдастыру мақсатында спорттық ойын алаңдары, жаттығу аймақтары мен демалыс орындары жабдықталған. Шығармашылық үйірмелер, мәдени-көпшілік шаралар, танымдық кездесулер мен спорттық жарыстар арқылы оқушылардың бос уақытын тиімді өткізуге барлық жағдай жасалған.
Айта кету керек, өткен жылы лагерь аумағында абаттандыру жұмыстары жүргізіліп, қоршаулары заманауи әрі қауіпсіз үлгіде жаңартылды. Сонымен қатар аумақ толық жарықтандырылып, қосымша жарық шамдары орнатылды. Бұл өз кезегінде балалардың қауіпсіз әрі жайлы демалуына қолайлы жағдай қалыптастырды.
Ашылу салтанатында балалар көтеріңкі көңіл күймен лагерь маусымын қарсы алып, мерекелік бағдарламаларға белсенді қатысты. Бүлдіршіндердің шат күлкісі мен қуанышты жүздері мерекенің мәнін арттыра түсті.
«Сыр ұланы» лагерінің жаңа маусымы балаларға ұмытылмас әсер, қызықты сәттер мен жарқын естеліктер сыйлайды деп күтілуде.
@Шиелі ауданы әкімінің баспасөз қызметі.
