Биылғы спартакиада аясында спорттың тоғыз түрінен жарыстар ұйымдастырылды. Тартысты өткен жарыстардың қорытындысы бойынша Жалағаш ауданының мемлекеттік қызметшілерінен құралған команда үздік нәтиже көрсетіп, жалпыкомандалық есепте І орынды иеленді. Команда мүшелері барлық кезеңдерде жоғары дайындық деңгейін, ұйымшылдық пен жеңіске деген жігерді танытып, аудан мерейін үстем етті.
Бұл жетістік – жалағаштық мемлекеттік қызметшілердің спортқа деген ерекше ынтасының, тұрақты дайындықтарының және салауатты өмір салтын ұстануының нақты көрінісі. Жарыс барысында аудан командасының мүшелері бірнеше спорт түрінен жүлделі орындарға ие болып, жалпы есепте қарсыластарынан басым түсті.
Айта кету керек, Жалағаш ауданының командасы өткен жылы да облыстық спартакиаданың жеңімпазы атанған болатын. Осылайша, жалағаштық мемлекеттік қызметшілер екі жыл қатарынан чемпиондық тұғырдан көрініп, аудан спортының абыройын асқақтатты.
Жеңімпаздар мен жүлдегерлер ұйымдастырушылар тарапынан арнайы дипломдармен, медальдармен және бағалы сыйлықтармен марапатталды.
Жалағаштық спортсүйер мемлекеттік қызметшілердің бұл жеңісі аудан жастарына үлгі болып, бұқаралық спортты дамытуға жаңа серпін беретіні сөзсіз.
