Әкімнің айтуынша, жыл басынан бері аудан экономикасының барлық негізгі салаларында тұрақты өсім қалыптасқан. Түзетілген аудандық бюджет көлемі несиелерді қоса есептегенде 16 млрд теңгеден асып, өткен жылмен салыстырғанда айтарлықтай ұлғайған. Алты айдың қорытындысында бюджет кірісі 100 пайызға орындалса, ауданның өз кірісі жоспардан асыра орындалып, 4,18 млрд теңгені құрады. Бұл соңғы үш жылда ауданның өз кірісінің 41 пайызға өскенін көрсетеді.
Өнеркәсіп саласында да оң динамика сақталды. Алты айда 44 млрд теңгенің өнеркәсіп өнімі өндіріліп, өңдеу өнеркәсібінің көлемі 37,8 млрд теңгеге жетті. Сонымен бірге ауыл шаруашылығының жалпы өнімі 5,7 млрд теңгені құрап, өткен жылға қарағанда жоғары нәтиже көрсетті. Құрылыс жұмыстарының көлемі, тұрғын үй пайдалануға беру және инвестиция тарту көрсеткіштері де өсіммен аяқталды.
Кәсіпкерлікті қолдау бағытында аудан бойынша 5 747 шағын және орта кәсіпкерлік субъектісі жұмыс істейді. Мемлекеттік бағдарламалар аясында 40 кәсіпкердің жобасы жеңілдетілген несиеге қол жеткізді. Сондай-ақ, 2025–2030 жылдары іске асырылатын 163,5 млрд теңгені құрайтын 18 ірі инвестициялық жоба жүзеге асырылып жатыр. Бұл жобалардың нәтижесінде 1024 жаңа жұмыс орнын ашу жоспарланған.
Жұмыспен қамту және халықты әлеуметтік қолдау шаралары да жүйелі жалғасуда. Биылғы алты айда 492 жаңа жұмыс орны құрылып, жыл соңына дейін бұл көрсеткішті 1021-ге жеткізу көзделген. Аз қамтылған 124 отбасының 669 мүшесіне атаулы әлеуметтік көмек көрсетілді.
Ауыл шаруашылығы саласында егіс көлемі 32,5 мың гектарға жетті. Оның ішінде негізгі дақыл – күріш 11,6 мың гектарға егілді. Сонымен қатар су үнемдеу технологияларын енгізу жұмыстары кеңейіп, лазерлік тегістеу көлемі ұлғайды. Биыл ауданнан 5,4 мың тонна күріш пен бау-бақша өнімдері Ресей, Қырғызстан, Тәжікстан және еліміздің өзге өңірлеріне экспортталуда.
Брифингте аудан әкімі инфрақұрылымды дамыту мәселесінеде ерекше назар аударды. Ауданда спорт кешендері, көпірлер, газ желілері, әлеуметтік нысандар мен тұрғын үйлердің құрылысы жалғасуда. Биыл облыстық бюджет есебінен 200 пәтер сатып алу жоспарланған. Сонымен бірге автомобиль жолдарын жаңғырту жұмыстары қарқынды жүргізіліп, бірнеше ірі жол жобасы іске асырылуда.
Газдандыру бойынша қазіргі таңда ауданның 19 елді мекені табиғи газға қосылған. Бұл аудан халқының 81 пайызын қамтиды. Ал сапалы ауыз сумен қамту көрсеткіші 100 пайызға жеткен.
Электр желілерін жаңғырту жұмыстарының нәтижесінде соңғы екі жылда желілердің тозу деңгейі 78 пайыздан 43 пайызға дейін төмендеген. Білім саласында аудан мектептерінің ҰБТ орташа балы 85,7-ге жетіп, облыс бойынша үшінші орынға көтерілді. Денсаулық сақтау саласында аудандық ауруханаға жаңа МРТ аппараты орнатылып, тұрғындарға жоғары деңгейдегі медициналық қызмет көрсету мүмкіндігі артты.
Брифинг барысында ауданды абаттандыру және «Таза Қазақстан» республикалық акциясының жүзеге асырылуы туралы да айтылды. Елді мекендерді көркейту, көшелерді жарықтандыру, тарихи-мәдени нысандардың аумағын абаттандыру бағытындағы жұмыстар жалғасып жатыр. Акция аясында белсенділік танытқан тұрғындар арнайы марапатталып, ынталандырылуда.
Брифингті қорытындылаған аудан әкімі Шиеліде қоғамдық-саяси ахуал тұрақты екенін айтып, алдағы уақытта да экономикалық өсімді сақтап, халықтың әл-ауқатын арттыруға бағытталған жұмыстар жүйелі түрде жалғасатынын жеткізді.
