Еске салсақ, осы жылдың сәуір айында УЕФА-ның стадиондар инфрақұрылымы жөніндегі өкілі Скотт Струзерс Қызылорда қаласына инспекциялық сапармен келген болатын.
Арнайы өкіл заманауи стадион құрылысымен толық танысып, УЕФА-ның стадиондар инфрақұрылымы жөніндегі регламентіне сәйкестігін тексерді. Нәтижесінде УЕФА стадионға ең жоғары IV санат берді.
Алдағы уақытта «Kaysar Arena» стадионы халықаралық деңгейдегі матчтарды, соның ішінде Қазақстан ұлттық құрамасының Еуропа чемпионатының іріктеу кезеңіндегі және Ұлттар лигасындағы ойындарын, Еурокубок турнирлері – Чемпиондар лигасы, Еуропа лигасы және Конференция лигасының іріктеу әрі негізгі кезеңдерін қабылдауға толық дайын.
Айта кетейік, Нұрлыбек Машбекұлының бастамасымен 26, 5 млрд теңгеге салынған «Kaysar Arena» стадионы өткен жылы ел Кубогының финалдық ойынымен ашылған болатын. Соңғы үлгіде жабдықталған стадионда футбол алаңынан бөлек, спорттық гимнастика, ауыр атлетика, бокс, күрес түрлеріне арналған залдар мен фитнес залы бар.
Қызылорда облысы әкімінің баспасөз қызметі
