Бүгінде ауданның қолайлы географиялық орналасуы, ауыл шаруашылығына қолайлы табиғи жағдайы және мемлекет тарапынан көрсетіліп жатқан қолдау шаралары инвесторлардың қызығушылығын арттырып отыр. Соның нәтижесінде аудан экономикасына ішкі және шетелдік инвестициялар тартылып, өндірістік жобалар кезең-кезеңімен жүзеге асырылуда.
Үстіміздегі жылы жалпы құны 70 млрд теңгені құрайтын 6 инвестициялық жобаны іске асыру жоспарланған. Бүгінгі күнге дейін олардың 5-еуі толық жүзеге асырылып, 120 жаңа жұмыс орны ашылды. Бұл жобалар ауданның өнеркәсіптік әлеуетін күшейтіп, халықты тұрақты жұмыспен қамтуға және бюджет кірісін арттыруға елеулі үлес қосуда.
Аудан үшін стратегиялық маңызы бар ең ірі инвестициялық жобалардың бірі – облыс әкімі Нұрлыбек Нәлібаевтың қолдауымен жүзеге асырылып жатқан швейцариялық «Харвест Агро Холдинг» компаниясының техникалық қарасора, жүгері және мақсары өсіру мен қайта өңдеуге арналған кешенді жобасы.
Жобаның жалпы құны 68 млрд теңгені құрайды. Бұл – Қызылорда облысында жүзеге асырылып жатқан ең ауқымды агроөнеркәсіптік жобалардың бірі. Жоба толық іске қосылған кезде жыл сайын 42 мың тонна техникалық қарасора, 70 мың тонна жүгері және 20 мың тонна мақсары өндірілетін болады. Өнімнің басым бөлігі терең өңдеуден өткізіліп, ішкі нарықпен қатар экспортқа жөнелтіледі.
Жоба аясында жылына 60 мың тонна ауыл шаруашылығы өнімін өңдейтін май сығу зауытының құрылысы жүргізілуде. Бұл кәсіпорын өңірде өңдеу өнеркәсібін дамытуға, жоғары қосылған құны бар өнім шығаруға және ауыл шаруашылығы саласының тиімділігін арттыруға мүмкіндік береді.
Биылғы жылы жоба аясында 5 мың гектар жерге жүгері, 2 мың гектар алқапқа мақсары егілді. Егіс алқаптарын сумен тиімді қамтамасыз ету үшін 142 жаңбырлатып суару қондырғысы іске қосылып, су үнемдеу технологиялары кеңінен қолданылуда. Бұл өз кезегінде өнімділікті арттырып, су ресурстарын тиімді пайдалануға жол ашуда.
Қазіргі уақытта жоба аясында 100 жергілікті тұрғын тұрақты жұмыспен қамтылған. Өндіріс толық қуатында іске қосылғаннан кейін қосымша жұмыс орындары ашылып, аудан тұрғындарын тұрақты еңбекпен қамту мүмкіндігі одан әрі кеңейе түседі.
Есепті кезеңде «Харвест Агро Холдинг» компаниясы аудан экономикасына 26,3 млрд теңге көлемінде инвестиция салды. Бұл қаражат өндірістік инфрақұрылымды дамытуға, ауыл шаруашылығы техникаларын сатып алуға, жаңбырлатып суару жүйелерін орнатуға және өндірістік нысандар салуға бағытталды.
Алдағы кезеңде де Жалағаш ауданында инвестициялық ахуалды жақсарту, жаңа өндірістер ашу, экспортқа бағдарланған кәсіпорындарды қолдау және заманауи технологияларды енгізу жұмыстары жалғасын табады. Бұл шаралар өңір экономикасының тұрақты өсімін қамтамасыз етіп, халықтың әл-ауқатын арттыруға, жаңа жұмыс орындарын құруға және ауданның инвестициялық тартымдылығын одан әрі нығайтуға мүмкіндік береді.
