Мерейтойлық шараның басты мақсаты – ел руханиятына өлшеусіз үлес қосқан ақын Кенжалы Ерімбетовтің өнегелі өмір жолы мен шығармашылық мұрасын кеңінен насихаттау, ақындық өнерді дәріптеу, жас таланттарға қолдау көрсету және өскелең ұрпақты туған жерге деген сүйіспеншілікке, елжандылыққа тәрбиелеу.
Мүшәйраға Қызылорда қаласы мен облыстың бірқатар аудандарынан келген талапкер ақындар қатысты. Байқау екі кезең бойынша өткізілді. Бірінші кезеңде қатысушылар мерейтой иесіне арналған арнау өлеңдерін оқыса, екінші кезеңде еркін тақырыптағы авторлық шығармаларын ұсынды.
Шара барысында мерейтой иесіне ізгі тілектер айтылып, құрмет көрсетілді. Ақынның сөзіне жазылған әндер орындалып, әдеби-музыкалық композициялар ұсынылып, өнерпаздар ән-жырдан шашу шашты.
Қазылар алқасының шешімімен:
І орын – Қызылорда қаласының ақыны Ақжол Түменбай;
ІІ орын – Арал ауданының ақыны Айдар Сайлауов;
ІІІ орын – Шиелі ауданының ақыны Бекжан Ержігіт пен Жалағаш ауданының ақыны Сәния Жақып иеленді.
Сондай-ақ, Қанат Көзейбай, Ақтөре Ибрагимұлы, Бексұлтан Санақұл, Тұрар Бекмырзаев және Ізбасар Әбдібеков байқауға белсене қатысқаны үшін Алғыс хатпен марапатталды.
Мүшәйра жеңімпаздары мен жүлдегерлеріне дипломдар мен бағалы сыйлықтар табысталды.
Өнер мен руханиятты ұлықтаған тағылымды шара мерейтой иесіне арналған ақжарма тілектермен жалғасып, естелік суретке түсумен қорытындыланды.
«Жырымен елін тербеткен» облыстық ақындар мүшәйрасы – Кенжалы Ерімбетовтің шығармашылық мұрасын ұлықтап, ақындық өнердің мәртебесін көтерген, жас таланттарға қанат бітірген мазмұнды мәдени-рухани шара болды.
