Жиын барысында шаһардың 2026 жылдың алғашқы жартыжылдығында әлеуметтік-экономикалық даму бағытында қол жеткізген нәтижелері мен алдағы кезеңге жоспарланған маңызды жобалар кеңінен таныстырылды.
Қала әкімінің айтуынша, биыл Қызылорда қаласына қарасты ауылдық округтерде жалпы көлемі 7 819 гектар жерге ауыл шаруашылығы дақылдары орналастырылған. Егіс құрылымын әртараптандыру саясаты аясында жаңа жоңышқа, қант құмайы, арпа, жаздық бидай, жүгері және судан шөбі егілді. Сонымен қатар тұрғындарды сапалы азық-түлікпен қамтамасыз ету және ішкі нарықтағы сұранысты өтеу мақсатында 2 450 гектар алқапқа көкөніс пен бақша дақылдары орналастырылды.
Өңірдің негізгі стратегиялық дақылы саналатын күріш биыл 2 681 гектар жерге себілді. Күріш шаруашылығының тұрақты дамуын қамтамасыз ету үшін суармалы су көлемін тиімді пайдалану және су тапшылығының алдын алу шараларына ерекше назар аударылып отыр.
«Ауыл шаруашылығы – өңір экономикасының маңызды тіректерінің бірі. Сондықтан бұл саланы дамытуға ерекше көңіл бөлінуде. Қазіргі вегетациялық кезеңде шаруашылықтарды аяқ сумен қамтамасыз ету тұрақты бақылауда. Су тапшылығының алдын алу мақсатында барлық қажетті ұйымдастыру жұмыстары жүргізіліп жатыр. Сонымен қатар су ресурстарын тиімді пайдалану үшін Қызылжарма каналының 9 шақырымдық бөлігін науалау жобасы кезең-кезеңімен жүзеге асырылуда. Бұл бастама су ысырабының алдын алып, егістік алқаптарын тұрақты сумен қамтамасыз етуге және ауыл шаруашылығы өндірісінің тиімділігін арттыруға мүмкіндік береді», – деді Қызылорда қаласының әкімі Нұржан Ахатов.
Айта кету керек, Қызылжарма каналын науалау жобасы өңірдегі су үнемдеу технологияларын енгізуге бағытталған маңызды инфрақұрылымдық жобалардың бірі болып саналады. Ұзындығы 9 шақырымды құрайтын каналдың құрылыс жұмыстары аяқталғаннан кейін су шығыны едәуір қысқарып, суармалы жерлерге судың тұрақты әрі тиімді жеткізілуіне жағдай жасалады. Бұл өз кезегінде ауыл шаруашылығы өндірісінің өнімділігін арттырып, табиғи ресурстарды ұтымды пайдалануға жол ашады.
Мемлекет басшысының су үнемдеу, егіс алқаптарын әртараптандыру және ауыл шаруашылығы саласының тұрақты дамуын қамтамасыз ету жөніндегі тапсырмаларын іске асыру аясында Қызылорда қаласында бұл бағыттағы жұмыстар алдағы уақытта да жүйелі түрде жалғасады. Заманауи су үнемдеу технологияларын енгізу, инженерлік инфрақұрылымды жаңғырту және шаруаларды қолдау шаралары өңірдің аграрлық әлеуетін арттыруға негіз болмақ.
Қызылорда облысының Өңірлік коммуникациялар қызметі
