Оқушылар сарайының қызыл лентасы осы жылдың 1-ші қазанында қиылған болатын. Бір айдан астам уақыт өтсе де іште ән айтып, би билеп жүрген бүлдіршіндерді байқау қиын. Бір мезетте 350 баланы қамти алатын орталықта үйірмелер саны саусақпен санарлық. Қызылордалықтардың көбісі дерлік бұл нысанның ашылғанынан да бейхабар екен.
– Оқушылар сарайының ашылғанын білесіз бе? Жоқ, білмеймін. Естіген жоқпын. Жалпы немерелеріңізді сол жақтағы үйірмелерге жіберер ме едіңіз? Қиындау, жібере ала алмаймын. Апаратын адам керек, жолды білмейді олар жас қой. – дейді ТЕМІРБЕК ЫСМАЙЛОВ, ҚЫЗЫЛОРДА ҚАЛАСЫНЫҢ ТҰРҒЫНЫ.
– Танысқан жоқпыз ғой мысалыға. Оқушылар сарайында қандай үйірмелер бар? Егер білсем, егер қызықтырса әрине балаларды жіберуге болады. – дейді БОТАГӨЗ СПАНДИЯРОВА, ҚЫЗЫЛОРДА ҚАЛАСЫНЫҢ ТҰРҒЫНЫ.
Қомақты қаржыға салынған орталық бүгінге түске дейін ғана жұмыс істейді екен. Қаланың сол жағалауынан бой көтерген оқушылар сарайына қоғамдық көлік әзірге толық қатынамайды. Сол себепті болар оқытушы педагогтар да толық қамтылмаған.
– Жалпы 50-ге тарта үйірме жүргізіледі деп жоспарланған. Бүгінгі таңда қабылданған мұғалімдерге байланысты 10 үйірме өз жұмысын жүйелі түрде жүргізіп отыр. Әлде де конкурстан өтпеген педагогтар бар, конкурс жарияланды басқа да үйірмелерге. – дейді ГАУХАР ҚҰДАЙБЕРГЕНОВА, ОҚУШЫЛАР САРАЙЫ БАСШЫСЫНЫҢ МІНДЕТІН АТҚАРУШЫ.
Басышылық жақын арада көлік мәселесін де шешеміз деп сендірді. Барлық үйірмелер толыққанды жұмыс істей бастаса автобус әкеліп, балаларға жағдай жасаймыз дейді.
P.S. Бір қызығы орталыққа алғаш келгенімізде іштен бір бала таппаған болатынбыз. Басшылықтан сұхбат алуға екінші мәрте келгенімізде барлық сыныптар оқушыларға толы болды. Айта кетейік, бұл әлеуметтік нысан демеушілік есебінен салынып, қалаға сыйға берілген болатын.
