Қызылорда облысындағы ІІІ Интернационал ауылында «Достық Жер МК» шаруақожалығы халық үлесіндегі алқапқа күріш егіп кәсіп қылады. Ауылдағы 400-ге тарта тұрғын жерін осы қожалыққа сеніп тапсырған. Бірақ соңғы жылдары төраға халықтың жерінен пайда тауып отырса да, үлескерлерге дивидент бермей әуреге салып келеді екен. Сондықтан 288 тұрғын өз үлестеріндегі жерді алып, өз алдына қожалық құруға шешім қабылдаған.
-Бізге төраға дивиденд, жем-шөп бермей қойды. Сондықтан бөлініп шығу бастамасын былтыр көтергенбіз. Бірақ аудан әкімдігі және басқарушы органдар өз үлестеріңізді алу мәселесін келер жылға қалдырыңыздар деп өтініш жасаған. Бүгін өзіміздің ойымызда жүрген құрылтайшылардың жалпы жиналысын өткізіп жатырмыз. Жиналысты барлық заң талаптарын сақтай отырып ұйымдастырдық», — дейді үлескер АЛТАЙ МҰСАХАНОВ.
Үлескерлердің бас қосуында үш мәселе көтерілді. Негізгісі жұртқа тиесілі егін алқабын өздеріне қайтару. Жиналғандар бұл бастаманы бір ауыздан қолдап дауыс берді. Яғни жалпы жиналыс барлық заң талаптарына сай өтті. «Енді тек шенеуніктер жұмысымызға кедергі болмай, ауыл жұртының тату-тәтті тірлік қылуына жол берсе» дейді көпшілік.
P.S. Жиын соңында ауыл ақсақалдары үлес бөлу мәселесіне баланысты жиынның оң шешімін тапқанына тілектестік білдірді.
