Пәтер иелері кооперативтерінің жұмысы талқылынды

Жиын барысында тұрғын үйлердің қалыпты әрі қауіпсіз пайдаланылуын қамтамасыз ету, ортақ мүлікті күтіп-ұстау, инженерлік инфрақұрылымның жай-күйін бақылау, санитарлық тазалықты сақтау және тұрғындардың өтініштері мен ұсыныстарына жедел әрекет ету мәселелеріне ерекше назар аударылды. Қала әкімінің орынбасары Дархан Тұрсынбаев бұл бағыттағы жұмыстардың сапасын арттыру тұрғындардың өмір сүру жайлылығын қамтамасыз етудегі маңызды міндеттердің бірі екенін атап өтті.
Сонымен қатар, тұрғын үй қатынастары саласындағы заңнамаға енгізілген өзгерістерге сәйкес басқару субъектілеріне берілген мүмкіндіктерді тиімді пайдалану қажеттігі айтылды. Әкімдік тарапынан бөлінген қоғамдық жұмысшылардың әлеуетін ұтымды ұйымдастырып, көпқабатты тұрғын үйлердің аумақтарын абаттандыру, санитарлық тазалық жұмыстарын жүйелі жүргізу және тұрғындармен кері байланысты күшейту бойынша нақты тапсырмалар жүктелді.
Кеңейтілген жиында көпқабатты тұрғын үйлердің кіреберістері мен ортақ пайдаланылатын орындарына жүргізілген мониторинг нәтижелері де таныстырылды. Мониторинг барысында санитарлық талаптардың сақталуы, инженерлік жүйелердің техникалық жағдайы, тазалық деңгейі және тұрғындардың қауіпсіздігіне әсер ететін бірқатар мәселелер зерделенген.
Тексеру нәтижесінде анықталған кемшіліктерді қысқа мерзім ішінде жою, тұрғын үйлердің ортақ мүлкін күтіп-ұстау жұмыстарын күшейту және мұндай олқылықтардың алдағы уақытта қайталануына жол бермеу жөнінде жауапты мекемелер мен пәтер иелері кооперативтеріне нақты міндеттер жүктелді.
Жиын қорытындысында тұрғын үй қорын сапалы басқару, тұрғындарға қолайлы әрі қауіпсіз орта қалыптастыру, сондай-ақ алдағы күзгі-қысқы жылыту маусымына дайындық жұмыстарын уақытылы әрі талапқа сай аяқтау бағытындағы жұмыстар тұрақты бақылауда болатыны айтылды.