Аталған көпір – аудан тұрғындары мен өңір арқылы қатынайтын автокөлік жүргізушілері үшін маңызды көлік нысандарының бірі. Сондықтан құрылыс жұмыстарының сапалы әрі белгіленген талаптарға сай орындалуы ерекше бақылауға алынған. Жұмыс барысында аудан әкімі жауапты сала мамандары мен мердігер мекеме өкілдерінің есебін тыңдап, құрылыс алаңындағы қазіргі ахуалға жан-жақты баға берді.
Мамандардың мәліметінше, қазіргі таңда нысанда атқарылып жатқан күрделі жөндеу жұмыстарының шамамен 75 пайызы аяқталған. Құрылыс-монтаж жұмыстары бекітілген кестеге сәйкес жүргізілуде. Келісімшарт талаптарына сәйкес көпірді пайдалануға беру мерзімі биылғы қыркүйек айына жоспарланған. Алайда аудан әкімінің тапсырмасына сәйкес құрылыс қарқыны барынша күшейтіліп, нысанды мерзімінен бұрын, яғни алдағы тамыз айында толық аяқтап, ел игілігіне беру көзделіп отыр.
Нысанды аралау барысында Ардақ Ибраимов құрылыс жұмыстарының әр кезеңі сапалы орындалуы тиіс екенін ерекше атап өтті. Оның айтуынша, тұрғындардың қауіпсіздігі мен көлік қозғалысының үздіксіз қамтамасыз етілуі – басты назарда болуы қажет.
– Құрылыс жұмыстары сапалы орындалуы тиіс. Құрылыс қарқынын арттырып, нысанды мерзімінен бұрын аяқтап, ел игілігіне табыстауымыз керек. Айналма жолға күнделікті су сеуіп, оны тегістеу жұмыстарын уақытылы жүргізіңіздер. Айналма жол уақытша болса да, жүргізушілерге қолайсыздық тудырмауы тиіс. Жұмысты қатаң бақылауға алып, тиісті деңгейде ұйымдастырыңыздар, – деді аудан әкімі.
Сонымен қатар аудан басшысы құрылыс барысында қауіпсіздік талаптарының толық сақталуына, пайдаланылатын құрылыс материалдарының сапасына және жұмысшылардың еңбек жағдайына ерекше көңіл бөлуді тапсырды. Жауапты мекеме басшыларына құрылыс жұмыстарының қарқынын бәсеңдетпей, белгіленген мерзімнен ертерек аяқтау үшін барлық қажетті шараларды қабылдау жүктелді.
Жұмыс сапары барысында уақытша ұйымдастырылған айналма жолдың жай-күйі де назардан тыс қалмады. Қазіргі таңда аудан әкімінің тапсырмасына сәйкес айналма жолды күтіп ұстау жұмыстары тұрақты түрде жүргізілуде. Атап айтқанда, жол беті арнайы техникамен тегістеліп, шаң көтерілмеуі үшін күн сайын су себіледі. Бұл шаралар тұрғындар мен жүргізушілердің қауіпсіз әрі қолайлы қозғалысын қамтамасыз етуге бағытталған.
Жол-көлік инфрақұрылымын жаңғырту – ауданның әлеуметтік-экономикалық дамуының маңызды бағыттарының бірі. Осындай жобалардың уақытылы әрі сапалы жүзеге асырылуы тұрғындардың өмір сүру сапасын жақсартып қана қоймай, өңірдегі көлік қатынасының тиімділігі мен қауіпсіздігін арттыруға мүмкіндік береді.
Жалағаш ауданында қолға алынған бұл жоба толық аяқталғаннан кейін «Қашыртқы» каналы арқылы өтетін көпірдің өткізу қабілеті артып, көлік қозғалысының қауіпсіздігі күшейеді. Бұл өз кезегінде аудан тұрғындары мен жол пайдаланушылары үшін қолайлы жағдай қалыптастырып, өңірдің көлік инфрақұрылымын одан әрі дамытуға серпін береді.
