23 тамызда өтетін Құрылтай сайлауы – елдің қоғамдық-саяси өміріндегі маңызды оқиғалардың бірі. Осыған байланысты ауданда сайлауды заң талаптарына сәйкес ашық, әділ әрі ұйымдасқан түрде өткізу үшін барлық дайындық жұмыстары кезең-кезеңімен жүзеге асырылуда. Жауапты мекемелер мен сайлау комиссиялары белгіленген жоспарға сәйкес қажетті ұйымдастыру шараларын орындап келеді.
Қазіргі таңда аудан бойынша барлығы 23 учаскелік сайлау комиссиясы жұмыс істейді. Оның ішінде 12 сайлау учаскесі жалпы білім беру мектептерінде, 9 учаске мәдениет үйлерінде орналасқан. Сонымен қатар аудандық полиция бөлімінің уақытша ұстау изоляторы мен аудандық аурухана базасында дауыс беру құқығы бар азаматтардың конституциялық құқықтарын қамтамасыз ету мақсатында 2 жабық сайлау учаскесі ұйымдастырылған.
Аудан әкімі аралау барысында әрбір сайлау учаскесінің сайлаушыларды қабылдауға толық дайын болуы қажет екенін атап өтті. Әсіресе, дауыс беру кабиналарының талапқа сай жабдықталуы, сайлау жәшіктерінің дайын болуы, байланыс құралдарының, электрмен қамту жүйесінің тұрақты жұмыс істеуі және қажетті ақпараттық материалдардың толық орналастырылуы басты назарда болуы тиіс екенін жеткізді.
Сонымен қатар мүмкіндігі шектеулі азаматтардың сайлау учаскелеріне кедергісіз кіруіне жағдай жасау, ғимараттардың санитарлық тазалығын сақтау, өрт қауіпсіздігі талаптарын орындау және қоғамдық тәртіпті қамтамасыз ету мәселелеріне ерекше көңіл бөлінді. Аудан басшысы жауапты сала жетекшілеріне сайлау күні тұрғындарға барынша қолайлы жағдай жасап, барлық ұйымдастыру жұмыстарын жоғары деңгейде өткізуді тапсырды.
– Сайлау – ел өміріндегі маңызды саяси науқан. Сондықтан әрбір сайлау учаскесі талапқа толық сай дайын болуы керек. Дауыс берушілердің қауіпсіздігі, қолайлылығы және заң талаптарының мүлтіксіз орындалуы – басты міндет. Әрбір жауапты мекеме өзіне жүктелген жұмысты сапалы атқаруы тиіс, – деді аудан әкімі.
Жұмыс сапарының қорытындысы бойынша Ардақ Ибраимов анықталған ескертулерді қысқа мерзімде жоюды, материалдық-техникалық қамтамасыз ету жұмыстарын толық аяқтауды және сайлау күніне дейін барлық учаскелердің әзірлігін қайта пысықтауды тапсырды.
Айта кетейік, Жалағаш ауданында алдағы саяси науқанды жоғары деңгейде ұйымдастыру бағытындағы дайындық жұмыстары тұрақты бақылауда. Жауапты мемлекеттік органдар мен учаскелік сайлау комиссиялары сайлау процесінің заң талаптарына сәйкес өтуін қамтамасыз ету үшін барлық қажетті шараларды қабылдап келеді.
