Нұргүл Нұрғали екі ай бұрын жаңа үйге көшіп келген. Көпбалалы ана осы уақыттан бері ауыз судан қиналып отырмыз дейді. Айтуынша, күндіз бойы тамшылаған кранның бойына тіршілік нәрі тек түнде толық қысыммен келеді екен. Отбасы мүшелері айлы түнде ұйықтаудың орнына қолдарына ыдыстарын алып, судың аққанын күтіп отыруға мәжбүр.
– Бір апта бұрын түнде 1,2-де ағатын су, сол кезде шамалы жинап алатынбыз. Қазір мүлдем ондай уақытта да ақпайтын болды. Көршінің үйнен жер асты судан сатып әкеліп, ыдыс-аяқ кір жуамыз. Ремонт деген тоқтап тұр. – дейді НҰРГҮЛ НҰРҒАЛИ, ҚЫЗЫЛОРДА ҚАЛАСЫНЫҢ ТҰРҒЫНЫ.
Ал, бұл Қызылорданың Шанхай мөлтек ауданы. Мұнда да сол жағдай. Тұрғындар суды соңғы бір айдан бері сатып алып, ал тұрмыстық шаруаларға жер асты суын пайдаланып отыр екен.
– Жылда ондай болмайтын еді, биыл су жоқ. Балалардың кірі тұр жуа алмай жатырмыз, ащы суға жуып жатырмыз. Жер асты суы бар, содан жуып жатырмыз. – дейді РАБИҒА МАХМҰТОВА, ҚЫЗЫЛОРДА ҚАЛАСЫНЫҢ ТҰРҒЫНЫ.
Өкінішке орай бұл су ішуге жарамсыз көрінеді. Су жүйесі мекемесі болса су жетіспеушілік қалада бар екенін растады. Оған себеп тұрғын үйлердің көбеюі дейді мамандар.
— Енді суымыз үй көбейген сайын потребление де көбейеді. Ол үйде 2,3,4 адамнан болуы мүмкін. Пайдаланушылар көбейген сайын біздер суымызды да беріп жатырмыз. Бірақ жетінкіремей жатыр ғой қазіргі таңда. – дейді НАУРЫЗ БАЙАРЫСТАНОВ, «ҚЫЗЫЛОРДА СУ ЖҮЙЕСІ» МКК-НЫҢ БАС ИНЖЕНЕРІ.
Тапшылықтың салдарынан дарияның көмегіне жүгінген мамандар сапаға да тоқталды. Айтуларынша ол судың химиялық құрамы көңіл көншітпейді екен.
— Ал жаз қалай басталады сразу бірден дариядан су алуға көшеміз. Енді дариядан су алмасақ скважиналарымызды жеткізе алмаймыз ғой. Мүмкіншілігіміз жоқ. Ол су ішуге жарамсыз емес, бірақ сульфат деген нәрсе бар. Өзі предельно допустимая концентрация дейді. Содан шамалы сульфаты асынқырап тұр. – дейді НАУРЫЗ БАЙАРЫСТАНОВ, «ҚЫЗЫЛОРДА СУ ЖҮЙЕСІ» МКК-НЫҢ БАС ИНЖЕНЕРІ.
Мәселені шешу үшін су жүйесіндегілер қала әкімдігіне ұңғымалардың саның көбейтуге ұсыныс беріпті. Шенеуніктерден мән-жайды білмек болып едік, нәтиже шықпады. Қызылорда қаласының әкімдігі жауаптылар бос емес деген уәжбен сұхбат бермеді. Дарияның суын ішіп, сападан үміт үзген қызылордалықтар болса жаз басталмай жатып көрген күніміз осындай, шіліңгір шілдеде не боламыз деп алаңдаулы.
