Қанды қылмыс Шиелі ауданына қарасты Бала би ауылында осыдан үш ай бұрын болған. Таңғы сағат төрт шамасында бөлмеде шырт ұйқыда жатқан әйелді жолдасы балталап тастаған. Айыптау актісі бойынша ер азамат өткір құралдың жүзімен жұбайының басын, иығын және қолын шапқан. Сөйтіп өзі сыртқа шығып кеткен екен. Ал шошып оянған қызы қан-жоса болған анасын көріп, дереу көмек шақырыпты. Соның арқасында жедел жәрдем қызметкерлері 42 жастағы жәбірленушіні аман алып қалған. Ал отағасының қатыгез әрекеті толық дәлелденді дейді соттың өкілдері.
“Ағаш сапты балтаны алып, ұйықтап жатқан сәтін пайдаланып, асқан қатыгездікпен бас тұсынан, иық тұстарынан бірнеше мәрте соққылар жасаған. Кәмелетке толмаған балалар оянып қалған сәтінде сотталушы өзінің қылмыстық іс-әрекетін ақырына дейін жеткізе алмай балтасын жерге тастап, шығып кеткен. Сотталушы ҚР ҚК 99-бабының 3,5-тармақтарымен (адам өлтіруге оқталу) кінәлі деп танылып, 15 жылға бас бостандығынан айыру жазасы тағайындалды,”-дейді Қызылорда облыстық қылмыстық істер жөніндегі мамандандырылған ауданаралық соты әкімшілігінің басшысы ЕРЛАН РАУШАНБЕКҰЛЫ
Ал отбасындағы сұмдық жағдай ерлі-зайыптылардың бір-бірін түсінісе алмауынан болған. Яғни әйелдің ақша табу үшін басқа қалаға барып жүмыс істеуіне күйеуі қарсылық білдірген. Үкімді онлайн тыңдаған жәбірленуші жолдасына кесілген жазамен келісті. Ал 21 жыл бойы биология пәнінің мұғалімі болған сотталушының туыстарының өз айтары бар.
“Келініміз балаларды тастап ініме Астанаға кетіп қалған. Оны іншім барып алып келіп, қанша жүгірді. Енді тәртіпке бағынбаған ғой. Келін деген балаларына қарау керек қой. Мен бұл неге келіспеймін. Інім өте ауыр жазамен айыпталып тұр. Жүрегіміз қан жылап тұр”,- дейді сотталушының әпкесі ГҮЛЖАН НҰРҒАЛИЕВА.
PS. Айта кетейік, балтаның ауыр соққысынан мүгедек болып қалған әйел жұбайымен 11 жыл бұрын шаңырақ көтерген екен. Екеуінің бес баласы бар. Олардың төртеуі кәмелет жасына толмаған.
