Жамбас сүйегіндегі жарақаттың кесірінен аяғынан нық тұра алмайтын Нұрлан Ерғонтаев қазір амалсыз төрт қабырғаға қамалып отыр. Ол 19 жыл бойы мектептің отымен кіріп, күлімен шығып жұмыс істедім дейді. Ал енді еңбек жарақатын алған соң басшылар керек етпей, далада қалдырды деп қынжылады.
“Жамбас сүйегі жоқ. Орнына дәрігерлер протез салып берген. Сол сүйекті ұстап тұру үшін. Бұған дейін арбаға таңылып отыратын”,- дейді жігіт ағасының әйелі Айнүр Тоқсанбаева.
52 жастағы жігіт ағасы №121 білім ұясында техникалық қызметкер болып істеген. Осыдан 7 жыл бұрын мектептің әжетханасын жөндеу барысында үстіме қабырғаның кірпіштері құлап, ауыр хәлде ауруханаға түстім дейді. Бірақ кейін балаларының қамы үшін сол мектептегі қызметін қайта жалғастырыпты. Ал былтыр ғимараттың жылу қазандығында жүріп тағы жарақат алған. Содан бері жұмысқа жарамсыз болып қалған азаматқа мектеп ұжымы тиісті өтемақыны бермей келеді дейді Нұрлан Ерғонтаевтың әйелі.“40 пайыздық өтемақыны төлесін деген ниетпен ізденіп жатырмын. Өйткені құзырлы органдардан сондай қортынды келген. Бірақ мектеп тарапынан әлі күнге тиесілі көмек берілмеді. Бұл кісінің екінші құлаған соң отадан кейін әлі де қиын. Балдақпен енді жүріп жатыр. Маған 8 баланы асырау өте қиын”, -дейді Айнұр Тоқсанбаева.
Келіншектің айтуынша еңбек инспекциясының өкілдері Нұрлан Ерғонтаевтың мүгедек болып қалуына себеп екі оқиғаға да мектеп басшыларының кінәсі бар деген. Яғни жауаптылар жұмысшының техникалық қауіпсізідігіне бей-жәй қараған. Оның үстіне еңбек жарақатына байланысты өтемақы төленуі тиіс депті.
Ал білім ұясының директоры төлем бойынша прокуратурамен кеңесіп жатырмыз дейді.
“Бұл жерде 40 пайыз ақша төленсін деген сөз жоқ. Тек жұмысқа жарамсыз деген сөз тұр дедім. Менің қағазымды прокуратура көріп жатыр. Заңдылығын көретін шығар. Бұл кісіден алған құжаттар бар ғой, негізгісін алып қалдым да қалғанын өткіздім прокуратураға”, — дейді №121 орта мектептің директоры Мұхтар Жұматаев.
PS. Атпалдай азамат балдаққа сүйеніп қалғандықтан, көпбалалы отбасы Айнұр Тоқсанбаеваның аз-маз табысымен күнелтіп келеді. Келіншек те дәл осы білім ұясында еден жуушы болып жұмыс істейді екен. Қазір қажетімізге қолымыз жетпей әбден титықтадық деген жандар сотқа жүгінбеске амалымыз қалмады дейді.
