Әдеп жөніндегі уәкіл алдымен Қарашеңгел ауылдық округіндегі мемлекеттік орган қызметкерлерімен сондай-ақ аудан әкімдігінің мәжіліс залында ауылдық округ әкімдері, дербес бөлім басшылары, мемлекеттік қызметшілер және жергілікті бюджеттен қаржыландырылатын мемлекеттік мекеме қызметкерлерімен кездесті.
Мәжілісті аудан әкімі аппаратының басшысы Ринад Тілеп жүргізіп, мемлекеттік қызмет саласында өзекті мәселелердің қатарындағы сыбайлас жемқорлықтың алдын алу, мемлекеттік қызметшілердің Әдеп Кодексінің талаптарын қатаң сақталуы маңызды екенін атап айтты. Соған сәйкес осы мәселелерге байланысты ауданға арнайы жұмыс сапарымен келген Әдеп жөніндегі уәкіл Бағдат Әбдіқадырды мәжіліске қатысушыларға таныстырып өтті.
Қарашеңгел ауылдық округі мен аудан әкімдігінің мәжіліс залында өткен қос бірдей кездесу барысында да Бағдат Нажмедденұлы мемлекеттік қызметшілерге ҚР мемлекеттік қызмет пен сыбайлас жемқорлыққа қарсы іс-қимыл заңнамаларының және Әдеп кодексінің нормаларына қатысты ақпарат беріп, мемлекеттік қызметшілердің құқықтары мен әлеуметтік кепілдіктер жөнінде түсіндірді. Сондай-ақ мемлекеттік қызметті атқару мемлекеттік қызметшілердің адамгершілігіне, этикасына және моральдық бейнесіне жоғары талаптар қоя отырып, қоғам мен мемлекет тарапынан ерекше сенім білдіру екендігін жеткізді.
Кездесулер соңында ұжымдағы моральдық-психологиялық ахуалдың жай-күйін мониторингтеу мақсатында мемлекеттік қызметшілерден анонимді сауалнамалар да алынды.
Аудан әкімдігінің мәжіліс залында өткен кездесуден кейін Бағдат Әбдіқадыр жеке қабылдау өткізіп, қабылдауға келген мемлекеттік қызметкерлердің өтініштері мен ұсыныстарын тыңдады. Сонымен қатар мемлекеттік қызмет көрсету сапасын арттыру, әдеп нормаларын сақтау, сыбайлас жемқорлықтың алдын алу мәселелері бойынша кеңінен түсіндіріп өтті.
