Ауру мал іш тастағанда бөлінетін сұйық заттарымен, өлі түскен төлмен бірге бруцеллездің қоздырғыштары сыртқы ортаға тарап, жайылым, қора, құрал-сайман, шөп, су ластануы мүмкін. Бруцеллез ауру малдың ет-сүт өнімдерін шикі немесе термиялық өңдеуден өткізбей пайдаланғанда, сонымен қатар резеңке қолғапты пайдаланбай ауру малды сою, қырқу және терісін өңдеу кезінде жұғады.
Қызылорда облысында ағымдағы жылдың 8 ай қорытындысы бойынша бруцеллезге шалдыққан 13 науқас есепке алынды. Бұл көрсеткіш былтырғы жылдың осы кезеңімен салыстырғанда 1,3 есеге төмендеді. Ауруға шалдығу деректері Қызылорда қаласы мен Қармақшы, Шиелі аудандарында анықталды. Бруцеллезді жұқтырғандар арасында ауыл тұрғындарының үлесі 69,2% құрады. Ауру ошақтарында індетке қарсы іс-шаралар жүргізіліп, қарым-қатынаста болған 44 адам тексерумен қамтылды. Нәтижесінде 1 оң нәтиже анықталып, медициналық бақылауға алынды.
Аурудың клиникалық белгілері – бұлшық ет ауырсынып, тәбет төмендейді, түнге қарай қатты тершеңдік пайда болады. Науқастың дене қызуы көтеріліп, басы, буындары ауырып, әлсіздік пен ұйқысыздық болады. Науқас дер кезінде медициналық көмекке жүгінбеген жағдайда ауру асқынып, мүгедектікке әкеліп соқ¬тыруы мүмкін. Сондықтан Қызылорда облысының санитариялық-эпидемиологиялық бақылау департаменті бруцеллез ауруының алдын алуда уақ малды төлдету, жүнін қырқу, оларға күтім жасау кезінде арнайы киім мен резеңке қолғапты қолдануға және ет-сүт өнімдерін термиялық өңдеуден міндетті түрде өткізіп, пайдалануға кеңес береді.
Гульмира Сыздыкова
Қызылорда облысының СЭБД басшысы
Фото: qamwy.kz
