Бүгін аудан әкімі Алмасбек Есмаханов аудандық мәслихат төрағасы Ғазиз Әліш және аудандық ардагерлер кеңесінің төрағасы Оразғали Бекпановпен бірге Әйтеке би кентінде тұратын ардагерлердің шаңырағына барып, Халықаралық қарттар күні мерекесімен құттықтады.
Аудан басшысы алдымен саналы ғұмырын құрылыс саласына арнаған еңбек ардагері Әбдіхалық Байбараұлы ақсақалдың шаңырағына барды. Аудандағы ауқымды саланың дамуы жолында қызмет атқарып, зейнет жасына жеткен қарт қазынаның бүгінде денсаулығы жақсы. Сексеннің алтауына жеткен ғұмыр иесі бүгінгі буынға үлгі болатын қазына кеуде жандар қатарында. Аудан басшысы ардагердің өнегелі өмірі кейінгі ұрпаққа үлкен үлгі екенін айтып, Президентіміздің, аймақ басшысының құттықтауы мен ізгі лебізін жеткізді. Сондай-ақ ақсақалдың иығына шапан жауып, сый-құрмет көрсетті.
Мұнан кейін аудан әкімі Ұлы Отан соғысы жылдарында тылда еңбек етіп, Жеңісті жақындатуға үлес қосқан ақ жаулықты ана — Дәмелі Бекжанқызының шаңырағына барды. Сонау замандағы қиын-қыстау кезеңде туған жердің амандығы үшін маңдай терін аянбай төгіп, адал еңбектің үлгісін көрсеткен кейуана бүгінде 93 жаста. Бүгінде тәрбиелеп өсірген 1 ұл мен 1 қыздан тараған немере мен шөберенің қызығын көріп отыр.
Аудан әкімі әрдайым елдің амандығын тілеп, жақсылық істерге ниеттес болып отыратын қарт ананың деніне саулық тілеп, аймақ басшысының арнайы құттықтау сәлемін жеткізді.
Қимылы ширақ кейуана өзін құрметке бөлеген азаматтарға ризашылығын білдіріп, іштегі шексіз қуанышын жасырмады. Сондай-ақ, өзінің өмір жолындағы естелік әңгімелерімен бөлісіп, халықтың тыныштығын тілеп, азаматтарға ақ батасын берді.
