Аудан басшысы алдымен Басықара ауылына барып, тұрғындарымен кездесіп, ондағы әлеуметтік нысандардың жұмысымен танысты. Тұрғындармен кездесу барысында Алмасбек Әбілқасымұлы ауданда аймақ басшысы Нұрлыбек Машбекұлының тікелей қолдауымен жүзеге асып жатқан бірқатар жобалар жайында сөз қозғап, алдағы жоспарлармен бөлісті. Басықара ауылындағы Ә.Тыныбаев атындағы су торабының жанында өткен басқосуда елді мекен жұрты да бірқатар түйткілдерді тілге тиек етті. Атап айтсақ, көпшілік округ ішіндегі жолдарды жөндеу, спорт кешенін салу, су ұңғымасын қазу, дәрігерлік амбулатория, балабақша жөндеу жұмыстарын жүргізу сынды мәселелерді ортаға салды.
Аудан әкімі тұрғындар көтерген мәселелердің әрбіріне жеке-жеке тоқталып, сұрақтарға толыққанды жауап берді. Сондай-ақ кейбір мәселелер бойынша алдағы уақытта заңдылыққа сәйкес зерделеу жұмыстары жүргізіліп, жұмыс жасалатындығын жеткізді.
Тұрғындармен кездесу мұнан соң Құмжиек пен Қарашеңгел ауылдарында жалғасын тапты. Аудан басшысы қос ауылда өткен кездесуде алдағы уақытта аудан халқының игілігі үшін жасалатын жұмыстарды сөз етіп, ауыл халқының ұсыныс-пікірлеріне құлақ түрді. Тұрғындар тарапынан айтылған ұсыныс-пікірлердің барлығын аудан басшысы мұқият тыңдап, барлығына да нақты жауап берді. Халықтың айтқан әрбір ұсынысын үнемі назарда ұстап, олардың оңтайлы шешілу жолдары қарастырылатынын жеткізді.
Айта кеткен жөн, аудан басшысы халықпен кездесулер барысында үш ауылдыңда мектеп, балабақша, дәрігерлік амбулатория сынды әлеуметтік нысандарын аралап, қысқы жылу беру маусымына дайындықтарын қадағалады. Мекеме басшыларына жылу беру маусымына дайындық жұмыстарына байланысты орын алған кемшіліктер бойынша шұғыл жұмыс жасап, жылу беру маусымы еш кедергісіз өткізу керектігін ескертті.
Аудан әкімі округтерге жасаған жұмыс сапарында Басықара ауылындағы Т. Мұсабаев көшесіне жүргізіліп жатқан орташа жөндеу жұмыстары мен Қарашеңгел ауылдық округтеріндегі Жалаңтөс батыр және Ә.Тлеубаев көшелеріне жасалып жатқан күрделі жөндеу жұмыстарын көрді. Мердігер мекеме басшысы мен тиісті сала басшыларына жол құрылысын сапалы әрі мерзімінде аяқтауды тапсырды.
