Концертке 300-ге жуық БҰҰ директорлары мен қызметкерлері, өзге ұлт өкілдері, басқа да өкілдіктер қызметкерлері және 80-ге жуық елшілер көрермен болды. Салтанатты шараны Дүниежүзілік сауда ұйымы мен халықаралық экономикалық ұйымдар жанындағы Қазақстан Республикасының Тұрақты өкілі Қайрат Төребаев және ҚР Елшісі Ерлан Алтынбайұлы ашты.
ҚР Мемлекеттік Гимні шырқалып, ұлттық фольклорымызды айшықтаған концертке көрермендер жоғары баға беріп, ерекше таңданыспен тарқасты. Концерттен соң қонақтарға ұлттық тағамдарымыздың түр-түрін қамтыған Швед үстелі үрдісімен ас мәзірі тарту етілді.
Концертте халық аспаптар ансамблі, «Томирис» би ансамблі, айтыскер ақын, үш дүркін «Алтын домбыра» иегері М. Ниязов, «Құрмет» орденінің иегері Ү. Медеуова, қазақ эстрадасының жарық жұлдызы Қ. Мейрамбек, «Мәдениет саласының үздігі» төсбелгісінің иегерлері А. Шағдатов, М. Мақұлбеков, дәстүрлі орындаушылар Ә. Қуаңбаев, Т. Өтенова, айтыскер-ақын Б. Орынбасар, Халықаралық және республикалық конкурстардың лауреаттары М. Аманжолов, А. Шадаев, А. Махамбетжан, А. Әбді, А. Төреғали және М. Жантөре, А. Шүкіров, Ж. Жұмабек (домбыра), Ж. Қайыпберген (жетіген), Н. Рүстемұлы (қыл қобыз), З. Нысанбаев (сыбызғы), Т. Аяпова халықтық саз сиқырымен еуропалық көрерменді таңдай қақтырып, ұлт өнерінің мерейін үстем етті.
Сыр бойының төлтума өнерін, қазақ ұлттық фольклорын жоғары деңгейде насихаттаған өнер иелері көрерменнің зор ықыласы мен құрмет-қошеметіне бөленді.
