Конституциялық Сот азаматтың Азаматтық кодекстің 914-бабын тексеру туралы өтінішін қарады, оған сәйкес құмар ойындарға қатысушылардың ұтысты өндіріп алуталаптары сот арқылы қорғалуға жатпайды.
Өтініш беруші бұл жағдай оның сот арқылы қорғалу құқығынан айырып, оны ойын бизнесін ұйымдастырушылармен теңсіз жағдайға қояды деп есептеді.
Бұл нені білдіреді
Конституциялық Сот құмар ойындар мен бәс тігуден туындайтын міндеттемелер бойынша соттық қорғалуға тыйым салу олардың тәуекелдік сипатына және құқықтық айқындықтың болмауына негізделгенін анықтады.
Алайда, бұл норма келісімшарт пен қорғаудың құқықтық кепілдіктері қолданылатын ойыншылар мен лицензияланған ұйымдастырушылар арасындағы қатынастарға қолданылмауы керек.
Конституциялық Сот заңды букмекерлік кеңседе немесе тотализаторда ойнайтын азаматтың ұтысын және шығындарды өтеуді талап етуге сотқа жүгінуге құқығы бар екенін атап көрсетті.
Қандай өзгерістер енгізілді
Конституциялық Сот Азаматтық кодекстің914-бабының ережесі «ойын бизнесін ұйымдастырушы құмар ойындарын және(немесе) бәс тігуді өткізудің шарттарын сақтаған кезде» деген сөздер бөлігінде Қазақстан Республикасының Конституциясына сәйкес келмейді деп таныды.
2009 жылы енгізілген бұл толықтыру норманың бастапқы мәнін бұрмалап, Конституцияға қайшы келді. Конституциялық Сот Үкіметке заңнаманы қабылданған қаулыға сәйкес келтіруді және конституциялық емес деп танылған ережеге негізделген сот шешімдерінің қайта қаралуын қамтамасыз етуді тапсырды.
Неліктен бұл маңызды
Бұл шешім азаматтар мен лицензияланған ойын бизнесін ұйымдастырушылар арасындағы қатынастарда әділдікті қалпына келтіріп, әрқайсысының сот арқылы қорғалу құқығын қорғады және заңнамада құқықтық нақтылықтың маңыздылығын атап өтті.
Енді заңды ойындарға қатысушылар ұтыстарын өндіріп алу және шығындарды өтеу үшін сотқа жүгіне алады, ал заң шығарушы орган Азаматтық кодекстегі түсініксіз және бір-бірін жоққа шығаратын баптарды жоюға міндетті.
Қызылорда облыстық прокуратурасы
