Оқиғаға байланысты ақпаратты қалалық білім басқармасы растады. Ведомствоның мәліметінше, қайғылы оқиға 6 сәуір күні, оқушы үйінде болған кезде орын алған.
«Жасөспірімді туыстары тапқан. Оқиға орнына жедел жәрдем шақырылған. Алайда дәрігерлер келген кезде оқушыда өмір белгілері болмаған», — деп түсіндірді Шымкент қалалық білім басқармасы.
Ресми мәліметтерге сүйенсек, жасөспірім бұрын арнайы медициналық есепте тұрмаған. Оның мұндай әрекетке бару себептері әзірге белгісіз.
Полицияда оқиғаға байланысты қылмыстық іс қозғалып, тергеу амалдары басталғанын хабарлады.
«Аталған дерек бойынша қылмыстық іс қозғалды. Қазіргі уақытта болған жағдайдың барлық мән-жайын анықтауға бағытталған кешенді іс-шаралар жүргізілуде», — деп мәлімдеді Шымкент қаласының полиция департаменті.
дереккөз: otyrar.kz
сурет:PostScript.kz
