Шараға аудандық қоғамдық даму бөлімі басшысының міндетін атқарушы Нұрлан Бектібаев, бірқатар ардагерлер, Тәжік-Ауған соғысына қатысқан ардагерлер мен олардың ұрпақтары қатысты.
«Тағзым» алаңына жиылған жұртшылық қаза тапқан қазақ жауынгерлерінің ескерткішіне гүл шоқтарын қойып, олардың ерлік жолдарына тоқталды.
Мұнан соң, Тәжік-Ауған шекарасында қаза тапқан жауынгерлерді еске алуға арналған шара аудандық қоғамдық даму бөлімі басшысының міндетін атқарушы Нұрлан Бектібаевтың төрағалығымен өткен кездесумен жалғасты.
«Ел үшін кеудені оққа тосқан қазақстандық жауынгерлер тәжік-ауған шекарасында айбынды ерліктің не екенін дәлелдеді. Қайтпас қайсарлық, батылдықтың ерен үлгісін көрсетті. Тәжікстандағы жағдай өте күрделі еді: елде азаматтық соғыс өрті лаулап, Ауғанстаннан есірткі мен қару тасыған содырлар шекараны еркін кесіп өтетін. 1992-2001 жылдары аралығындағы 9 жылға созылған ұрыс қимылдарында 46 қазақстандық сарбаз қаза тапты.
Өмірінің өлшеулі бір бөлігі, жауқазын жастық шағының сүбелі үлесін оқ пен от астында өткізіп, тағдырдың жазуымен елге аман-сау оралып, туған жерімен қауышқан майдангер ағаларымызбен кездесу – біздер үшін зор ғанибет» деді НҰРЛАН БЕКТІБАЕВ, ЖАЛАҒАШ АУДАНЫНЫҢ ҚОҒАМДЫҚ ДАМУ БӨЛІМІ БАСШЫСЫНЫҢ МІНДЕТІН АТҚАРУШЫ.
Сонымен бірге, Қазақстан Жазушылар одағының мүшесі, «Жалағаштан Ауғанстанға дейін» атты кітаптың авторы Тұрақ Адисұлы, Тәжік-Ауған соғысының ардагері Құрманбек Ысқақов Отан алдындағы борыш-міндетін адал атқарып, патриоттық парызын өтеп қайтқан қазақ жауынгерлерінің есімі ел жадынан өшпейтінін жеткізді.
Жиын барысында бірқатар Тәжік-Ауған соғысының ардагерлеріне Қазақстан әскерінің Тәжік-Ауған шекарасынан шыққанына 25 жыл толуына арналған төсбелгілер мен аудан әкімінің алғысы табысталды.
Айта кетейік, Тәжік-Ауған шекарасында қаза тапқан жауынгерлерді еске алуға арналған шаралар легі Б.Құлтекенов атындағы жабық бассейінде мектеп оқушылары арасындағы еркін жүзуден аудандық жарысқа ұласты.
