Игі шараның басты мақсаты – киелі орындардың тазалығын сақтау, тарихи-рухани мұраға деген құрметті арттыру және тұрғындар арасында экологиялық мәдениетті қалыптастыру болды.
Аталған бастамаға аудандық мәслихат төрағасы Жарқынбек Ғалымжан, ел ағалары, мекеме қызметкерлері, қоғам белсенділері, еріктілер, жастар және жергілікті тұрғындар белсене қатысып, ортақ іске жұмылды. Қатысушылар туған жердің тазалығы мен көркін жақсартуға өз үлестерін қосып, ұйымшылдықтың жарқын үлгісін көрсетті.
Шара барысында тарихи маңызы зор, халық жиі зиярат ететін аумақтарда ауқымды көркейту-көгалдандыру жұмыстары жүргізілді. Атап айтқанда, кесене маңы мен зираттар аумағы қоқыстан тазартылып, шөптер шабылды. Сонымен қатар, жаңа ағаш көшеттері отырғызылып, жасыл аймақтарды көбейтуге басымдық берілді. Қоршаулар ретке келтіріліп, ескірген тұстары жөнделді. Жолдарды тазалау және қалпына келтіру жұмыстары да қатар жүргізіліп, келушілерге қолайлы жағдай жасауға ерекше мән берілді.
Ұйымдастырушылардың айтуынша, мұндай акциялар тек санитарлық тазалықты қамтамасыз етіп қана қоймай, халықтың табиғатқа деген жанашырлығын арттырып, рухани құндылықтарды дәріптеуге ықпал етеді. Себебі киелі орындардың тазалығы – өткенге тағзымның, тарихқа құрметтің және болашаққа деген жауапкершіліктің көрінісі.
Жалпы, аталған шара аудан тұрғындарының белсенділігі мен бірлігін айқын көрсетіп, «тазалық – имандылықтың белгісі» деген ұстанымды тағы бір мәрте дәлелдеді. Осындай игі бастамалар алдағы уақытта да жалғасын тауып, өңірдің экологиялық ахуалын жақсартуға және рухани орындардың келбетін жаңғыртуға өз үлесін қоса бермек.
