Аталған шара Қасым-Жомарт Тоқаев бастамашы болған «Таза Қазақстан» республикалық экологиялық бағдарламасы аясында жүзеге асырылды. Сонымен қатар, аймақ басшысы Нұрлыбек Нәлібаев тарапынан берілген нақты тапсырмалар негізінде ұйымдастырылған бұл акция өңірдегі тазалық мәдениетін қалыптастыруға бағытталды.
Негізгі іс-шара Жаңақорған ауданындағы тарихи әрі киелі орындардың бірі – Хорасан ата кесенесі аумағында өтті. Акцияның басты мақсаты – рухани маңызы зор нысандардың тазалығын сақтау, оларды келешек ұрпаққа таза әрі көрікті күйде жеткізу, сондай-ақ тұрғындар арасында экологиялық мәдениетті арттыру болды.
Шара барысында тарихи-мәдени ескерткіштер, киелі орындар және халық көп баратын зираттар аумағында кешенді тазалық жұмыстары жүргізілді. Атап айтқанда, аумақтарды қоқыстан тазарту, шөптерді шабу, ағаш отырғызу, көгалдандыру жұмыстарын күшейту, қоршауларды жөндеу және ретке келтіру, жолдарды тазалау мен қалпына келтіру секілді жұмыстар кең көлемде атқарылды. Сонымен бірге, еріктілер мен тұрғындар кесене маңындағы инфрақұрылымды жақсартуға да өз үлестерін қосты.
Жалпыхалықтық акцияға 2 мыңнан астам аудан тұрғыны, еріктілер, мемлекеттік мекеме қызметкерлері, жастар ұйымдары мен қоғамдық бірлестік өкілдері белсене қатысты. Олардың бірлескен еңбегінің нәтижесінде 10-ға жуық қасиетті орындар мен зираттардың аумағы толық тазартылып, ретке келтірілді.
Ұйымдастырушылардың айтуынша, мұндай шаралар тек бір реттік тазалық жұмыстары ғана емес, қоғамда қоршаған ортаға деген жауапкершілікті арттырып, рухани құндылықтарды дәріптеуге бағытталған маңызды бастама. Себебі тазалық – тек сыртқы көрініс емес, ол адамның ішкі мәдениеті мен рухани деңгейінің айқын көрінісі.
Осылайша, Жаңақорғандағы бұл игі шара тұрғындарды ортақ іске жұмылдырып қана қоймай, “тазалық пен руханият – ажырамас ұғым” екенін тағы бір мәрте дәлелдеді.
