Игі шараның басты мақсаты – ұлттық мұра саналатын тарихи орындардың тазалығын сақтау, олардың келбетін жақсарту және тұрғындар арасында экологиялық мәдениетті қалыптастыру.
Аталған бастамаға аудан әкімінің міндетін атқарушы Бақтияр Ахметов, ел ағалары, түрлі мекеме қызметкерлері, қоғам белсенділері, еріктілер, жастар және жергілікті тұрғындар белсене қатысып, ортақ іске жұмылды. Қатысушылар туған өлкенің тазалығы мен көркін арттыру жолында ұйымшылдық танытып, игі іске өз үлестерін қосты.
Тазалық жұмыстары барысында киелі орындардың аумағы тұрмыстық қалдықтардан тазартылып, бей-берекет жатқан қоқыстар жиналды. Сонымен қатар, аумақты абаттандыру және ретке келтіру бағытында бірқатар жұмыстар атқарылды. Атап айтқанда, шөптер шабылып, айнала тазартылды, жаяу жүргіншілер жолдары реттеліп, келушілерге қолайлы жағдай жасауға басымдық берілді.
Ұйымдастырушылардың айтуынша, мұндай шаралар тарихи орындардың сақталуына ғана емес, өскелең ұрпақтың туған жерге деген құрметін арттыруға да ықпал етеді. Себебі Сығанақ қалашығы мен Сунақата кесенесі – еліміздің рухани және мәдени мұрасының ажырамас бөлігі саналады. Оларды күтіп-ұстау, тазалығын сақтау – әрбір азаматтың ортақ міндеті.
Жалпы, акция аясында атқарылған жұмыстар нәтижесінде киелі нысандардың аумағы толық тазартылып, келбеті жақсара түсті. Осындай игі бастамалар алдағы уақытта да жалғасын тауып, өңірдің экологиялық ахуалын жақсартуға және тарихи-мәдени мұраларды сақтауға өз үлесін қоса бермек.
