«Аудан бойынша өткен жылу беру маусымы тұрақты жағдайда өтті. “Қыстың қамын жаз ойла” демекші, аудандағы барлық әлеуметтік және бюджеттік мекемелер бу қазандықтарының жай-күйіне жан-жақты зерделеу жүргізіп, анықталған кемшіліктерді дер кезінде қалпына келтіруі қажет. Тұрғындарға жеткізілетін қатты отын қорына қатысты кәсіпкерлермен осы бастан меморандум жасаңыздар. Алдағы жылыту маусымында халықты отынмен қамтуда және әлеуметтік нысандардың бу қазандықтарына байланысты ешқандай мәселе туындамауы тиіс», – деді АРДАҚ ИБРАИМОВ, ЖАЛАҒАШ АУДАНЫНЫҢ ӘКІМІ.
2025-2026 жылдардағы жылу беру маусымына аудан бойынша қатты отынға қажеттілік 9300 тоннаны, сұйық отынға қажеттілік 1708 тоннаны құрады. Нәтижесінде 11 400 тонна қатты отын жеткізіліп, жоспар 116,3 пайызға орындалды.
Елді мекендерді табиғи газ желісіне қосу мақсатында Бұқарбай батыр, Қаракеткен және Далдабай ауылдарын газдандыру бойынша демеушілер есебінен жобалау-сметалық құжаттар әзірленіп, қаржыландыруға ұсынылды. Аудан әкімі аталған елді мекендерді газдандыру жұмыстарын жеделдетіп, газ желілерін тарту бағытындағы шараларды күшейтуді тапсырды.
Мәжіліс қорытындысында күн тәртібіндегі мәселелер бойынша жауапты сала басшыларына, кент және ауылдық округ әкімдеріне хаттамалық тапсырмалар берілді.
