Тағылымы мол рухани шараға аудан әкімінің орынбасары Нариман Жахудаев қатысып, Қызылорда облысы әкімі орынбасарының және аудан әкімі Мажит Самитовтың құттықтау лебізін жеткізді.
Салтанатты шара барысында өнер иесінің мәдениет саласын дамытудағы ұзақ жылғы елеулі еңбегі мен ұлттық өнерді насихаттаудағы зор үлесі жоғары бағаланып, ауданның ең жоғары марапаты – Құрмет грамотасы табысталды. Сондай-ақ қазақы дәстүрге сай иығына шапан жабылып, құрмет көрсетілді.
Кеш барысында Қазақстан Республикасының Мәдениет қайраткері Гүлмира Ақүрпекова, «Қазақстанның еңбек сіңірген қайраткері», белгілі әнші-композитор Дүйсенхан Сыздықов өнер көрсетсе, Қызылорда облыстық мемлекеттік филармония ұжымынан арнайы келген «Сыр самалы» вокалды-аспапты ансамблі мен «М-Band» тобы көрермендерге көтеріңкі көңіл-күй сыйлап, кештің шырайын аша түсті.
